Update 20/1/2022: 因應 2019 冠狀病毒病的最新情況，「南丫說：」公共藝術計劃室內展覽繼續暫停開放，直至另行通告。除線上活動外，所有公眾節目暫停。 我們會繼續密切留意有關情況，並於「南丫說：」面書專頁及 Instagram 公布最新安排。 * 戶外展覽仍然開放

---

大家對南丫島嘅印象多數都係假日遊客眾多嘅榕樹灣，為咗令大家可以發現島嘅另一個面貌，同埋加深島民之間嘅跨文化連結，藝術推廣辦事處推出「南丫說：」公共藝術計劃 今次計劃選址以索罟灣為中心的南丫南舉辦展覽，以藝術角度探索由海陸互動構成嘅生活方式。計劃一共邀請咗 15 組藝術家及團隊進行創作，於展覽期間中會有一連串相應活動，包括導賞團、社區工作坊同埋紀錄片放映。 以下係部分展品： 何遠良《索罟社區菜園》 「靠山吃山，靠水吃水」？南丫島擁有豐富嘅天然資源，明明山澗小溪隨處可見，但食水供給就偏偏依賴對岸嘅水塘。 藝術家何遠良 提倡「一方水土養一方人」，佢嘅創作意念主要圍繞水同空氣兩大範疇，喺島上進行可持續嘅社區耕作，嘗試培養出地道香菇、蔬菜，更築起一個水池活用當地嘅水土資源。希望真正達至「保水養地」，加強人同自然嘅連結。 歡迎大家到下面IG，睇吓植物生長歷程，了解吓阿良今次嘅可持續社區耕種實驗：@lamma.mia_farm 陳百堅《夜靜時聞索罟犬》 藝術家陳百堅（Brandon）慣以想像同現實交織出故事，並將故事轉換成充滿遊戲玩味嘅藝術表述。嚟到南丫島，佢想像自己同島上嘅狗狗深夜漫遊索罟灣，以靈敏嘅聽力尋找同蒐集各種聲音。 佢喺駐村期間又藉著同島民一齊放狗，聆聽島上狗狗嘅故事，從另一個角度認識南丫南 除咗一隻隻狗狗造型嘅裝置之外，Brandon 製作嘅聲音地圖之後都會喺網上發布，等大家喺島上遊走嘅同時可以嘗試搵下各種聲音嘅來源地 大家嚟到索罟灣都可以 scan 下狗狗裝置身上嘅 QR Code，用聽覺重新發現同認識島上嘅微敘事，想像自己喺夜靜之中聆聽南丫南嘅聲音 林建才與劉清華《看見風：旗幡及長椅》 南丫島除咗四面環海，每逢節慶仲有一片旗海 藝術家林建才同劉清華就以節慶時常見嘅三角旗幟作原型，製作咗多面旗幡，印上島民常用嘅航海用詞：「開新」、「扎風」等。佢哋仲利用廢棄長椅做支架、岸邊嘅磚瓦碎片同漁民常用嘅杪木條，重新打造咗兩張長椅。 大家可以係碼頭旁邊一路聽海浪，一路細讀佢哋編撰嘅《南丫南俚語字典》 Sharu B. Sikdar 《葉慢漫》 南丫島島民一直都同大自然和諧共存，呢種與自然嘅密切關係引起咗印度菲律賓裔藝術家 Sikdar 嘅興趣。索罟灣隨處可見嘅蕉樹令佢諗起同樣遍佈蕉樹嘅家鄉菲律賓，於是佢延續過往運用自然物料作為創作媒介嘅風格，用島上蕉葉製作咗幾百個風車，希望透過風車裝置為南丫島帶嚟祝福。 沈君怡《島上航遊》 乘船渡海，係島民生活不可或缺嘅一環，但每日穿梭喺南丫海面嘅，又點止載人嘅渡輪？南丫島所處嘅東博寮海峽正正係香港主要航道之一，無數貨輪每日來回往返、川流不息 藝術家沈君怡（阿蟬）作品《島上航遊》就將南丫南常見漁船、貨輪、街渡紛紛變成互動玩具船，仲邀請咗島民為船隻上色㖭！小朋友可以一嘗駕駛船隻嘅趣味，用想像力將陸地化為大海，喺陸上遊船河！