麻煩務必睇晒所有字： ＊＊首先唔好問點解搞到咁複雜（其實唔複雜），總之唔係呃錢：此次音樂會是新成立的一次性fan club「戟會2022」活動，成功以$500購買「戟會2022」會籍（限定人數，與座位數目一樣）一定可以得到免費門券一張，詳情請看萬字文下面的萬字文＊＊ 《前因後果》 話說有啲隊員已經知道發生緊咩事，就係尋日，我好衝動咁接受咗呢個突然發生的個人音樂會機會。(發生原因在留言處) Σ(っ °Д °;)っ 我平時有選擇困難症和好怕臨急臨忙做決定，如果本身已經諗定食乜，但去到餐廳叫外賣時 (app冇得叫) 對方話冇晒那種食物的話，我就會方寸大亂，但又唔好意思阻住人，最後就會亂叫咗自己唔鍾意食的東西 而尋日因為技術和行政原因，我一定要在短時間內決定做定唔做5日後的個人音樂會。 其實俾多幾日我諗的話我應該會選擇唔做的了，我呢啲玻璃sim耐冇做show真係好想繼續逃避的，唔搞咪唔會失敗囉 (票房)，唔搞咪唔會做得冇人哋咁好囉 （'·ω·`*） 但係尋日一來時間緊迫，驚唔把握今個機會就會冇下一次咁珍貴的巧合機會 (叫我出去自己搞一個音樂會我真係冇動力和會諸多藉口推搪)，二來被大家在另一邊的甜言蜜語留言感動到流晒口水鼻涕，所以就... 話雖如此，本人都係鍾意戴頭盔戴到大氣層咁高先安落，所以請大家留意下列事項，接受到先好join會員入場觀看： 1. 大概會唱20首自己的歌，但就快更年期其實唔太鍾意唱啲好輕快得意的那些歌，或那些live唱到厭，搞到就算冇唱好多年都覺得厭的歌 2. 而家淨係簡簡單單有隊band伴奏我就最高興。如果要整video和佈景和諗其他花臣我就會唔高興 (就算係人哋幫我整都唔高興)，所以冇整，而且都冇時間整。有啲人可能會覺得悶，請留意 3. 冇見咁多年，我好似全地球正常人類一樣都係會老咗的，希望大家高抬貴手唔好討論我有冇老或老咗幾多 (づ ●─● )づ 4. 我嚮往斷捨離，多謝大家心意，不用送禮，謝謝 ლ(‧ω‧ლ) 5. 我而家真係好容易喊，可能由開頭喊到尾令人覺得煩厭，接受到的話，都唔洗擔心我，我唔開心又喊，開心又喊，感動又喊，街邊隻貓痾唔出屎又喊，我淨係喊，冇事的 (இωஇ ) 6. 我以前不嬲都成日彈錯唱錯，今次生疏咗咁多，應該會錯得更加嚴重 7. 尋日hey不會係我的嘉賓，我唔會和他合唱，因為我有強烈的自尊唔想靠佢吸引人買飛和搞熱個氣氛。佢個人冇問題，只係我個自尊大過大帽山 「但係佢借個場地空檔俾你wor，你唔洗還返個人情俾佢咩？」 呢個係憑我自己本事借來的空檔，點解要還？ ♪～(´ε｀　) 總之，多謝大家盲目的支持。（來唔到的都多謝大家的虛擬支持） (つд⊂)

---

【會員福利】 - 每個會籍將獲得《the pancakes 亂入大初戀日喊足成晚音樂會》入場券1張 (一定有位) - 一次性會員證1張 - 於音樂會現場購買the pancakes個人保存最後一批自己出版的實體CD、DVD和書籍 (每款大概20件) 和以前出過的t-shirt (約30款，每款只有一件，雖然未著過自己純收藏有膠袋裝住，但因為年月摧殘，所以狀態唔太理想) (很抱歉，以前因為搬屋dump咗好多好多好多好多好多自己全新的產品，我都覺得好心痛，但係作為斷捨離嚮往者望住呢啲體積龐大的東西仲辛苦) (萬一反應熱烈，現場可能會限制每人只可以買一件產品) - 於音樂會現場購買the pancakes由elefant records出版的7吋紅色黑膠唱片 (大概十幾隻，我keep咗二十年一直都唔捨得賣，因為覺得好珍貴，好驚賣一隻少一隻，又好驚普通價錢賣完之後啲人容易dump咗或棄置在足球場更衣室，所以希望用高價HK$1,000義賣，令到真係好想好想買的人才買，款項不會扣除成本全數捐去「香港流浪狗之家」，收據將會在3個月內刊登在我日久失修的網頁 (此次義賣並非和「香港流浪狗之家」的合作，純粹本人單方面捐款)

---

【音樂會注意事項】 ＊此次音樂會只限已成功登記的會員參加。加入了的會員將獲得音樂會門票1張，並採用實名制，會員於現場取票及入場時均需要提供身份證明文件核對身份。 ＊一人一票憑票入場。一經入會，除因不可控制之原因而需要取消音樂會外（例如極端天氣），不可退款。 ＊為免音樂會延誤，請預早在當日一小時前 (即晚上7點)，憑入會確認電郵及身份證明文件親臨香港演藝學院一樓歌劇院門口前台接待處領取會員證及音樂會門票。 ＊座位將由主辦單位根據入會完成付款之時間以公平原則分配，不設自行選擇座位。 ＊請配合場館因應最新防疫預防措施所實施的特別安排及遵守政府公布最新的防疫預防措施，否則場地有權拒絕相關人士進場，有關入會費用恕不退還，敬請見諒。 ＊主辦機構保留更改活動節目的權利。 ＊6月1日前已經是我patreon會員的隊員可以確保一定入到會，詳情請看patreon晏啲出的post