Update 29/6/2022: 週末好去處，蒲吧全日 show 不停 特別加開！！免費！！【蒲吧廿週年音樂祭 - 下午場】 【蒲吧廿週年音樂祭】一出街，就收到好多蒲吧 band 友嘅心聲，都想番嚟呢個一齊成長嘅地方共同回憶睇 band show，終於蒲吧團隊都不遺餘力、竭盡所能搞到個【蒲吧廿週年音樂祭 - 下午場】俾大家盡興。 蒲吧一直愛青年人所愛，一直相信每個青年都有才能 【蒲吧廿週年音樂祭】兩場 show 邀請嘅 band 隊，可能有你好熟悉好鍾意嘅，亦有你不認識嘅，但蒲吧就係一個畀青年人可以自由發揮同埋發光發亮嘅舞台，每一位上台嘅 band，都好值得大家嘅支持同鼓勵，有你哋嚟先有台上嘅表演者，多謝大家支持蒲吧！7 月 9 日見！ 表演嘉賓︰ King Ly Chee Revery 帶菌者 藍圖 KATER The Lemon Ones 同日其他活動（12:30pm - 10:00pm)： 蒲吧 open day 打卡日 蒲吧廿週年音樂祭 一系列精心製作紀念品（免費派發）

---

蒲吧 20 歲大啦！ 蒲吧一直愛青年人所愛，一直相信每個青年都有才能，而蒲吧就係一個俾青年人自由發揮嘅舞台，咁多年都發展咗好多唔同文化，亦都有好多好出色青年喺度誕生！ 想當初有幾個鐘意夾 band 嘅同事，就土炮式搞下歌唱比賽，然後見好多青年鍾意音樂，同事就自己組成 band 隊有活動就表演下，就係咁，一班對 band 有熱誠嘅同事，推動左蒲吧成為一個 band show 嘅聖地。 20 年嚟，蒲吧 band 文化嘅發展有高有低，有做得好亦有需要改善嘅地方 而蒲吧都好感激一路以來，有好多 band 友、band 隊都一齊陪住蒲吧成長，當中大家一定都有好多深刻而又開心嘅成長回憶，每一個曾踏足蒲吧嘅人，都非常感激！ 呢 3 年因為疫情，蒲吧都無可奈何地搞少咗好多show，而藉著今次「蒲吧廿週年音樂祭」，蒲吧都好想能夠同 band 友一齊慶祝盡興，但因防疫關係，場地人數亦有限制，所以決定當日所有 band show 門票，都會喺網上售票平台，公開及以實名制形式發售，希望人人都可以有公平機會買到飛，亦希望多 D 人買到飛啦！！！ 最後，知道大家今次唔夠喉嘅！未來一有機會，就會繼續搞 band show 㗎！㗎！㗎！ 多謝大家繼續支持蒲吧！7 月 9 日見！ 表演嘉賓︰ Neko No Kizu Zpecial Pandora ToNick Kolor 逆流 * 門票收益扣除開支，全數撥捐協青社青少年發展用途 1. 因場館防疫規定，入場館前必需利用「安心出行」手機應用程式掃描場所二維碼，並向場館職員出示已掃瞄畫面。 2. 入場觀眾須符合「疫苗通行證」要求，否則場地有權拒絕入場，而門票款項將不獲退回。請隨身攜帶電子或紙本的疫苗接種紀錄或豁免證明書，而有關「疫苗通行證」詳情請參考 https://bit.ly/3LuXdKC 。 3. 如閣下有發燒症狀、體溫高於 37.5 度或未有佩戴口罩，主辦方有權拒絕閣下進場，有關門票費用恕不退還。 4. 協青社範圍內「無煙、無酒、無毒品」，而表演場館內亦嚴禁飲食，觀眾須在音樂會期間全程妥善戴上口罩，如有違反，主辦方有權請其離場，有關演唱會門票費用亦恕不退還。 5. 如政府公佈更新防疫措施，屆時必須遵守最新之防疫安排。

---

Update 21/6/2022: - 實名制門票將於 27/6 10am 公開發售

---

「蒲吧廿週年」咁大件事點可以唔講呀 20 週年梗係約定大家一齊 happy 準備定一系列精彩嘅活動等緊你：音樂祭 > 桌球 > 飛鏢 > 籃球 9/7/2022 蒲吧廿周年音樂祭 band show 約定你！！！到時見！！！