【MYO 五月音樂會】打開古典音樂大門，感受柴可夫斯基嘅瑰麗樂章 曲終人不散～繼今年元旦舉辦嘅《20週年音樂會》完美落幕後，MYO 好高興嚟緊五月份再次踏上舞台，為大家獻上幾首由俄羅斯作曲家彼得·伊里奇·柴可夫斯基（Pyotr Ilyich Tchaikovsky）譜寫嘅動人樂章，一齊走入浪漫古典音樂世界！ 柴可夫斯基出生於俄羅斯，係十九世紀浪漫主義音樂嘅代表之一。佢筆下嘅樂章澎湃、感人肺腑，仲別具俄羅斯民族風格，作品總會令人一聽就愛上，為後世留低難以磨滅嘅印象。喺依場音樂會裡面，MYO一眾年輕音樂家將會演繹幾首佢嘅經典名曲選段，例如：《胡桃夾子組曲 — 糖梅仙子之舞》、《意大利随想曲》同《羅密歐與茱麗葉幻想序曲》；我哋亦好榮幸請嚟音樂劇演員、創作人同聲樂指導鄭君熾（Jordan Cheng），以說書人角色旁白敘事，帶觀眾進入作曲家嘅情感世界，獲得親歷其境嘅感受。 小音樂家已經準備好啦！期待同你再度聚首音樂廳，感受管弦樂扣人心弦嘅威力。敬請期待！