取名自日本超長壽漫畫《烏龍派出所》一猛男角色，イルカポリス 海豚刑警 於2017年大爆誕，面世未幾即以〈當ㄋ沉睡ㄉ時候告訴婐ㄋ夢到ㄌ婐〉、〈大家都唾棄ㄉ低能婐爱ㄋ〉、〈甜甜圈之亂〉等生猛又坦率至極嘅作品跑出，加上成員們各種隨心情而轉換嘅角色設定同火星文體，構成一套海豚專屬美學，集結成首張大碟《豚愛特攻隊》。 以主唱／結他手伍悅翻唱透明雜誌〈少女〉為起點，經歷過與DSPS、厭世少年等台灣樂隊結緣、代表作〈安平之光〉爆紅、入圍台灣金曲獎（最佳樂團）…… 海豚累積種種體驗後於去年推出續作專輯《羽球大報社》，由透明雜誌主音洪申豪操刀監製，有延續早期日式搖滾風格嘅〈羽球少年〉及〈best friend〉+ 編曲上野心勃勃長近11分鐘演奏曲〈蛙蛙哭了叫三小xd〉+ 氛圍魔幻得似童謠嘅〈Fall Fall〉等等，每一首都似係濃緒咗無盡情緒與故事，今年初喺大港開唱第一次睇現場，真係有大爆射（報社）嘅感覺。 走完日本tour、與DSPS合體暑期巡迴過後，イルカポリス 海豚刑警將於今年10月13日首度來港公演，有Neoncity Records主理人 Daviouxx 擔任開場嘉賓，預售門票現正發售。