11月12日，Clockenflap Presents 將為大家帶嚟台灣創意團隊「夜間限定工作室 NIGHTONLYSTUDIO」旗下兩位說唱音樂人 wannasleep 及 Gummy B 嘅香港專場音樂會。 高中畢業後開始進行說唱類型創作，外表溫文儒雅嘅 wannasleep 喺2021年發表首張大碟《裸夢》時，已經建立出自己一套具詩人氣息嘅說唱風格，並以專輯贏得該屆金音創作獎嘅最佳新人，同年與經理人張晴成立廠牌，再簽下後起之秀 Gummy B。而貴為今年台灣選秀節目《⼤嘻哈時代2》出爐亞軍，從台大嘻研社發跡 Gummy B，在學時期以其刁鑽嘅多音節韻腳 + 各種唱腔靈活轉換驚艷樂迷後，又快速開發出另一套生活化嘅寫意風格，並以首張專輯《安泰》作階段記錄。兩位分享相近創作視野嘅新世代台灣說唱好手，今年合體創作，並於上週推出全新EP《BS》，展現歷來最成熟、最具野心嘅成果。