漂物意指物件漂流，源於上世紀60年代於歐洲嘅漂書活動，當時書友將自己睇完嘅書貼上標籤投放到公共場所，例如公園長凳上，免費提供比拾取嘅人閱讀，而下一位讀者就會根據標籤提示，再以相同方式將書投放到其他公共場所；漂書活動得以延續，幫助文化傳播，亦可以減少資源浪費，一舉兩得。 而咁有意義嘅「漂流教室」喺今個星期六，將由灣仔浸信會帶領下「漂」到M7， 今次除咗漂書外更有漂玩具、文具，活動除咗推動減少浪費，更連繫人與人之間嘅關係，連結社區；同時培養小朋友知足同惜物之心，珍惜一切所擁有嘅事物，從而推動建立同發揮互助互享嘅精神。活動更有即場寫書法、小朋友最愛嘅Face paint 活動以及油畫展出，活動內容非常精彩！ 如果你都有書本、文具、玩具可以捐出，就記得星期六一齊到M7參加啦！