聖誕節就快到啦 ! 今年愛協會喺灣仔「HarbourChill海濱休閒站」舉辦全港最大型嘅寵物友善聖誕嘉年華之一「Chill『毛』海濱走走」，等大家可以同毛孩又食又玩，歡度佳節。嘉年華佔地接近3,000平方米，集合超過 40檔食、買、玩攤位，分為5個特色專區（滋味專區、海邊酒酒、聖誕市集、寵物特色市集、毛孩放電區）提供與別不同嘅體驗！ 除咗攤位，嘉年華仲有聖誕限定嘅夢幻打卡點同埋本地歌手音樂表演，而家立即為大家首先介紹！ 夢幻打卡點： 高達8米嘅巨型聖誕樹同1.8米高嘅飄雪水晶球，配埋點點星光同維港海岸嘅夜景，氣氛格外浪漫動人。 音樂表演： 本地歌手顧定軒、張進翹、男子組合Match、以及女子組合XiX 同EOS約定你喺12月23日至25日晚上現場見，透過歌聲同小遊戲與大家慶祝聖誕。 想知5個特色專區有咩咁特別，就密切留意著我哋啦！