自從10月尾”Ham”lloween Party之後，幼稚園已經2個月冇同大家喺市集見面啦大家有冇掛住幼稚園嘅鼠鼠同自家產品啊？如果有嘅話，恭喜你願望成真啦！！幼稚園將會於12月30日-1月1日一連三日喺南豐紗廠 M樓 The Annex舉辦領養日！同大家一齊迎接2024年！ 同之前嘅領養日一樣，今次都會有鼠鼠出席架！鼠鼠同老師們嘅新年願望一定係希望鼠鼠可以喺市集度揾到佢地真正嘅家，大家會唔會幫下鼠鼠們實現願望啊~ 其實幼稚園都有收到過少數鼠友嘅反映，表示去咗領養日現場但鼠鼠冇出黎玩所以睇唔到鼠鼠，冇得睇下鼠鼠嘅性格或者外表係點其實大家可以唔洗怕醜主動揾我地嘅暫托老師們詢問關於鼠鼠嘅資料，老師們都好樂意分享鼠鼠平時生活嘅片段比大家睇，等大家可以更了解待領養鼠鼠嘅特點！當然，都可以先行個圈，陣間再返黎望下鼠鼠有冇醒到啦~ 不過要留意~由於幼稚園現時嘅待領養鼠鼠數量不多，所以未必每一隻出席嘅鼠鼠都係待領養鼠鼠哦！已經畢業嘅畢業生鼠鼠們或者老師們養嘅鼠鼠都有機會出席領養日，比眾多對鼠鼠有興趣、想了解倉鼠嘅朋友們可以有機會接觸鼠鼠同學習一下關於倉鼠嘅資訊。 除咗待領養鼠鼠之外，大家最期待嘅地方一定係小賣部嘅義賣商品！今次老師們都會努力製作好味又真材實料嘅自家製鼠鼠磨牙餅比大家嘅鼠鼠食仲有好多鼠鼠相關嘅自家產品，例如小袋子、杯套、Tee恤等等，仲有少量艾特贊助嘅商品，希望大家多多支持。 今次領養日將會係幼稚園參加同舉辦嘅第十個活動啦，好感謝大家一直以黎嘅支持，好多朋友幾乎每次市集都會出席，即使冇時間出席，都會幫幼稚園分享貼文，令更多人認識幼稚園，見到有咁多人願意支持我地，真係非常非常感動的。大家嘅支持真係幼稚園非常大嘅動力，希望今次都可以見到各位，同你地一齊交流鼠鼠飼養心得。新嘅一年，祝各位鼠爸鼠媽人鼠都健康快樂，食得玩得！ (為免發生危險，請大家將鼠鼠留在溫暖家中，現場亦不設鼠聚及嚴禁鼠鼠之間交流，幼稚園希望人鼠平安，多謝大家)