2025年3月16日，蘇格蘭後搖滾巨擘 Mogwai 將會相隔十年再度訪港，喺西九自由空間大盒舉行大型專場音樂會！

九十年代英國Britpop浪潮席捲全球，身處英搖盛世，有人歡喜有人嬲，遠在蘇格蘭格拉斯哥嘅四位band仔對當時日播夜播嘅各種流行搖滾曲風感到相當厭倦，而佢哋嘅反動方式，係從美國post-hardcore樂隊取經，炸爆所有既定嘅旋律和弦節奏結構，炸到剩返排骨，再喺焦土上重新建立自己相信嘅搖滾美學，一種被後來者歸納為後搖滾（post-rock）嘅美學。

樂隊名源自經典可愛魔幻恐怖片《Gemlins 小魔怪》中，閒角以廣東話對班大耳小妖嘅稱呼。Mogwai 由1997年首張大碟《Young Team》開場曲〈Yes! I Am a Long Way From Home〉3分44秒嘅結他大爆炸起，為當時樂迷開拓出一幅全新音樂版圖。繼千禧前後一連發表《Come On Die Young》、《Happy Songs For Happy People》、《Mr Beast》三張經典鉅作後，Mogwai愈發精於編寫既能狂暴洶湧，又能細膩深邃嘅史詩質感；陸續有不同電影人邀請樂隊製作電影配樂，而第一擊就係頗具實驗性，以法國球王施丹為主角嘅紀錄片《Zidane: A 21st Century Portrait》。

Mogwai喺2014年嘅《Rave Tapes》完成再一次變奏，將電鼓、合成器、modular大量融入編曲中，兇猛依舊，形成擺脫已成框格嘅後搖滾，甚至有丁點舞曲元素嘅電氣魔怪風格，兩年後為紀錄片《Atomic, Living in Dread and Promise》配樂嘅其中一首〈U-235〉更係100%電子樂曲。全新進化為樂隊引來新一批年輕樂迷，連續兩碟打入英國唱片榜Top 10，2021年嘅《As The Love Comes》晉身冠軍大碟，現場演出亦更加豐富。

愈夾愈有貨嘅 Mogwai 今年推出全新單曲〈God Gets You Back〉，並宣布喺2025年舉行世界巡演，我哋好開心可以話畀大家聽三月會有香港站！今次係佢哋繼2014年Clockenflap主舞台壓軸登場後，久違十年嘅香港公演，嘆過爽過嘅資深樂迷們自然知道Mogwai現場係值得睇無限次嘅跳牆級音樂體驗，新入坑嘅朋友仔，亦係值得你哋瞓身期待嘅第一次。