自獨立發展以來，Kendy Suen以充滿詩意的曲式，與樂迷探討生命的哲學，隨着她的個人風格愈趨成熟，Kendy的音樂領土亦成功衝出香港，今年先後4次到日本宣傳。離港多時，Kendy終於回家，推出全新單曲《維納斯的誕生》，並將於12月假英皇娛樂期間限定概念店0 e:ffect Concept Store 2/F 舉辦新歌同名展覽，首次展出書法作品，更邀得7位藝術家聯乘合作，舉辦工作坊及分享會，與樂迷近距離深入交流。

新歌曲詞編監一手包辦 Kendy：「想講愛嘅多元性」

新歌《維納斯的誕生》由Kendy一手包辦曲詞編監，創作的概念來自一場朋友間的對談：「同朋友傾偈，講起愛呢個話題，到底愛係乜嘢呢？講吓講吓，我發現好多人對愛都有唔同睇法，呢個命題，對好多人嚟講都好困惑，我自己都係，諗諗吓，或者我哋都唔使太早參透。《維納斯的誕生》就係想講愛嘅多元性，畀大家多啲唔同面向嘅思考。」

MV的部分，Kendy再度點名邀請男神莫竣名擔任男主角，她大讚對方很有味道：「我覺得佢同我嘅歌啲氣質好夾，今次我哋仲特登去咗台灣觀音草漯沙丘拍攝，嗰個位真係大風到癲咗，啲頭髮幾乎冇正常過，我直頭以為自己拍緊《沙丘》，多謝佢肯同我玩到咁盡，真係辛苦晒。」她笑言自己的個性亦很像沙土，既可以流動，但是遇到對的環境又可以很穩定。

期間限定Kendy Suen 新歌同名展覽《維納斯的誕生》

至於期間限定的同名展覽，Kendy指她的想法與創意的呈現，從來都不限於音樂：「有4句說話，可以將我哋嘅心比喻成美術家、書畫家，佢可以繪畫世間萬物，心係無所不能，想要乜嘢，心都可以成就。呢4句話就係『心如工畫師，能畫諸世間，五蘊悉從生，無法而不造。』既然心可以創造一切、美化一切，點解我哋唔用心去美化呢個世界，創造一片人間淨土呢？」這次更是Kendy首次展出個人書法作品，她直言心情緊張：「雖然我由2018年寫到而家，某程度上書法已經係我生活嘅部份。因為寫嗰陣要好專注，我覺得好似做緊冥想咁，每筆每劃都呈現緊當下最真實嘅自己，要展示出嚟，感覺都幾赤裸。」展覽期間，Kendy將舉辦書法體驗工作坊，期待大家感受到當中的寧靜與美好，亦可以與樂迷齊齊為2024年畫上美麗的總結。

除了Kendy，《維納斯的誕生》展覽亦邀得K.Chung、Crystal Leung、Alessia、Hei Luk、Riddick Douglas及Reni Haymond7位藝術家聯乘合作，她說：「到時我哋會有唔同嘅工作坊同分享，令大家透過藝術活動感受更多愛，同埋可以同大家近距離見吓面、傾吓偈。」