繼 Clockenflap 音樂及藝術節2024 嘅精彩演出後，我哋興奮宣布日本math-rock天團 toe 將於今年9月30日再度來港作專場演出，happy new year！

由兩位結他手美濃隆章、山嵜廣和、鼓手柏倉隆史及低音結他手山根敏史組成，早期嘅 toe 深受芝加哥獨立音樂場景，尤其scream-o emo樂派影響，亦從 Fugazi、Tortoise、Sunny Day Real Estate 以至 The Roots、Four Tet 等不同類型高手取經。經過數年演出精進風格累積創作能量後，toe 於2005年推出因為專輯封面通稱為鹿碟嘅 《the book about my idle plot on a vague anxiety》，水準之高可謂出道即巔峰，將源自美國嘅math-rock概念融會貫通，消化成有別於西方前輩們粗獷美學嘅另一番詩意，從〈孤独の発明〉及〈tremolo+delay〉等名曲中，已經可以聽見 toe 招牌式細膩流暢嘅爽脆結他，加上強調鼓點走位嘅編曲，兼具實驗膽量與悅耳旋律，廿年後再聽依然能夠令人耳目一新。