香港嘅樂迷注意啦！百年好合終需一別，呢次係大家最後一次機會，可以親身感受丹麥獨立搖滾經典大團 Mew 嘅現場演出！經過咁多年創造出空靈嘅音樂世界同埋令人難忘嘅旋律，Mew 終於要展開佢哋嘅告別巡演。樂迷們絕對不能錯過11月16日於西九自由空間大盒 The Box 舉行嘅Farewell Tour香港場。門票將於3月21日香港時間早上10:00於 Ticketflap 公開發售。

Mew 成員自細個就認識同埋一齊玩音樂，1997年以首張大碟《A Triumph For Man》橫空出世，Jonas 充滿穿透性嘅魔幻歌喉，加上樂隊混合前衛搖滾思維嘅冷冽曲風，令當時嘅indie樂迷樂評深感震撼；而奠定 Mew 作為世界級獨立搖滾名團地位，則必需要提到2003年推出嘅天碟《Frengers》。副題為《Not Quite Friends But Not Quite Strangers》，Mew 結合「Friend」以及「Stranger」二字，寓意喺佢哋譜寫嘅音樂世界中，所有人都係未成為朋友嘅陌生人，日後亦慣常以此稱呼一眾粉絲。專輯收尾嘅〈Comforting Sounds〉更可謂千禧頭十年最具代表性嘅indie史詩神曲之一 —— 由 Jonas 領唱開場，結他、弦樂與合成音效輪番滲透，所有累積壓抑嘅情緒直至4分22秒引爆撲面而來，縱使係簡單嘅和弦節拍堆疊，仍然足以逐步撕裂你內心所有防線，解封任何被冷藏疏遠嘅回憶 —— 繼2013年灣仔 The Vine，及2017年九展 Music Zone 後，我哋今個十一月又有機會再一次，亦好有可能係最後一次原汁原味現場感受此曲威力。時隔八戴再次來港公演，同時係樂隊臨別秋波嘅告別巡演，相信樂隊會以最落力嘅舞台演出，同追隨多年嘅新舊樂迷一同分享呢個重要時刻，表達謝意，我哋亦帶著不捨而雀躍嘅心情，與各位一同期待呢場特別演出！．請勿誤信非官方售票渠道

Follow 埋 Timable 演唱會 FB 專頁：
https://www.facebook.com/timable.hk.concerts