縱橫演藝40年 跨越舞台20載 星光閃耀 維肖維妙 歌舞連場 爆笑瘋狂 兩代「扮野天王」交手 詹瑞文盧海鵬 網盡老中青 盧海鵬和詹瑞文兩代「扮野天王」，將於6月14及15日在紅館首度聯手舉行扮野騷《奇幻扮嘢大典》。日前兩人齊齊為該騷拍攝宣傳照，還試了多個造型，除了有鵬哥耍家的籮記羅文和徐小鳳造型外，還有新鮮熱辣的畢彼特和少年Pi造型，兩人扮起嘢來猶如孖生兄弟一樣，場面搞笑！近年減產的鵬哥，坦言首肯演出是希望現場扮嘢給年輕一代看，而向來有中年觀眾捧場的詹Sir，則希望拍住鵬哥能吸引更多年長觀眾入場，實行老中青觀眾一網打盡。 在網上打上盧海鵬和詹瑞文兩個名，相關的文章或資料，都離不開「扮野」兩個字，講到「扮野」兩人在圈中確實可稱王稱霸，特別是現年71歲的鵬哥，相信大部份港人都看過他的扮野演出，連拍檔詹Sir亦稱是看他的演出長大，今日的扮嘢能力，可能就是童年看得多他的演出培養而成。 鵬哥笑言未有機會正式看過詹Sir演出，反而兩人並非首次同台，「十幾年前，我去登台演出時，見到同台有個人扮King Sir做棟篤笑好似，後尾佢成左名先知o個個就係佢。其實我地算同過台，當然今次好唔同，大家扮野方法好唔同，佢話要挑戰我？唔係會想整你死o個種，反而係大家都好，撞到火花出黎！今次除左會一齊扮D經典人物外，我最希望扮到粵劇大老倌，我以前都有做過大戲，我扮波叔（梁醒波）同麥炳榮都無問題o既！」 今次鵬哥答應演出，除了因跟詹Sir合作，原來還有使命感，「上次《蝦仔爹o地》個騷為左宣傳扮左畢彼特放上網，阿女即刻打電話畀我，話咩點擊率好高，o個陣時先知咩叫點擊率，我求其扮之嘛！估唔到d後生仔鍾意，我想今次畀佢地現場睇下我點扮野，希望吸引到班年輕觀眾！」 詹Sir坦言鵬哥是兒時偶像，以往演出亦被指有鵬哥影子，當日兩人相約傾合作時，也驚覺大家似樣，「我05年做《男人之苦》時，何韻詩已經話我好似鵬哥，o個時我都不以為意，但係o個日老闆丘生（丘亞葵）約我地傾時，見到鵬哥又真係覺得大家幾似樣喎！我地好似介乎於父子同兄弟之間，真係好有趣！」 全文及來源: http://www.hkheadline.com/ent/ent_content.asp?track=news&contid=234287&srctype=n