香港藝術中心「極品廣告片」昂然踏入第廿四年，今年我們精挑細選來自英國、美國、亞太區、西班牙、拉丁美洲及韓國的廣告，收集世界各地廣告人源源不絕的靈感和創意，繼續向觀眾發放笑彈。萬勿錯過！ 節目一 (57mins) 2014亞太廣告節精選 29/11 2:30pm | 30/11 6:30pm | 06/12 5:00pm | 10/12 8:00pm 13/12 8:30pm及14/12 2:30pm之場次將加映香港廣告商會金帆大獎精選，片長為20分鐘 亞太廣告節，日本多年獨領風騷，年前異軍突起的泰國還未望其項背。泰國街頭警察死命追著賊人，玩哂飛躍道，結局竟是「平嘢去得快」。馬來西亞的器宮捐贈廣告，讓捐贈者與受助者同睡一張床，創意大膽。即食麵大佬穿越到古羅馬時空，作戰前食杯麵是生存本能反應。日本管弦樂團處方聽入腦唔食得落肚的「管弦樂丸」，美顏要執一劑韋華第的《四季》。仲唔夠皮睇印度劉華沙魯克汗的濕身飲品廣告。潮流興自拍，菲律賓靈機一觸，變成全球籌款活動「豈止自拍」。身穿禮服由雪山頂滾落山，型過動作片男星百倍，愈滾愈隨興，愈滾愈多同道中人。 節目二 (59mins) 2014 British Arrows廣告大獎精選 29/11 4:30pm | 05/12 8:00pm | 07/12 6:30pm | 13/12 6:30pm | 14/12 4:30pm 話明係英國點少得酒吧同足球？英超指定啤酒品牌索性叫哂英超球星球迷球證球評一齊上過山車開波，無球場照落場。咁，曼聯大帝簡東拿在老家落場扮農夫推銷法國啤酒都啱數。幽默是大不列顛另一樣耍家嘢，神級百貨公司諗得出《唔好意思，我使哂喺自己身上》聖誕小禮物系列，仲要影住收禮人失望扮高興嘅表情，抵佢橫掃多個廣告頒獎禮大獎。另一幽默之選，宅男要同六舊腹肌鍾意除衫嘅猛男爭女仔，只有上太空呢條路。日本汽車玩轉變型金剛，一粒螺絲模搣下搣下，搣出電單車、私家車仲有飛機。大奬得主，將食用醬汁當做可憐小動物，要出動拯救隊奪門，再幫佢哋搵過主好人家。計最震撼一定係美少女日日俾條追魂索追住唔放，頂唔順按一下鍵盤，搭上下一站天國列車，你睇過一定不敢忘記。 節目三 (57mins) 2014美國AICP廣告大獎精選 30/11 2:30pm | 06/12 7:00pm | 07/12 4:30pm | 13/12 4:30pm | 14/12 6:30pm 美國AICP廣告大獎出咗名唔止鬥專業仲要鬥藝術。由技術鬥到藝術層面，男士香水廣告，一班母親在阿仔談情時，於沙發坐墊彈出，在沙灘深處伸出頭來，甚至攬住個小提琴從天而降，好笑到反枱，想知點解自己睇。美國錢多，明星也多。愛德華．諾頓幫電訊網絡拍廣告，死過翻生幾次，濕碎。啤酒廣告叫當哲度拖住隻草泥馬搭電梯，阿諾舒華辛力加戴假髮打乒乓波。朱古力夾心餅大玩三隻小豬、吸血殭屍和鯊魚的MV動畫夠清新和同場放映的手機程式遊戲動畫一樣是大顯身手之作。兩大電腦遊戲商的廣告，美術功夫精細又講究。早前瘋傳動作片男星尚格．雲頓拍貨車逆行廣告，是大顯身手的典範。 節目四 (61mins) 2014西班牙及葡萄牙語系廣告節精選 + 2013韓國影像廣告節精選 30/11 4:30pm | 07/12 2:30pm | 12/12 8:00pm | 13/12 2:30pm | 14/12 8:30pm 西葡兩國，浪漫先行，飲香檳是戀愛配套屬意料之中。意料之外是凡事都可浪漫化，例如奧巴馬演說，加上鋼琴伴奏即變身為一首歌。浪漫到入心入肺的是「你比你心目中的自己美麗」自畫像行動，藝術家首先隔著布簾，聽著當事人描述自己為她畫一幅肖像，又聽當事人的朋友描述給她畫第二幅肖像然後並置，結論？你懂的，不贅。信用卡削鐵如泥，一卡在手，相機、電腦開兩半，微波爐斬四件，電視機切成十幾件，信貸的好壞盡在不言中。 與西葡相比，韓國的廣告強調城市生活的驅動力多於浪漫情懷。每當奏起《天鵝湖》就是女性眼火爆的警號，而眼火爆竟帶來以為男人才有的後遺症。韓國廣告另一特點是多版本，透過不同版本的廣告維持產品新鮮感。智能電話化身成旅遊立體書，因地制宜，足足用六個版本的誠意，才贏得評審決定性的一票。 講座: 廣告片=產品的音樂錄像？ 日期及時間: 06/12 2:30pm – 4:00pm 地點: agnès b.電影院 （香港灣仔港灣道2號香港藝術中心高層地庫） 免費入場，先到先得。 報名: http://www.hkaconlineregistration.com/event.php?lang=MQ==&en=MTg0 講者: 區雪兒 (著名廣告、音樂錄像及電影導演) 粵語主講 「音樂錄像是歌手的廣告片，廣告片就是產品的音樂錄像。」周身刀張張利的導演Susie Au (區雪兒)，自九十年代起，策劃過數以百個風格獨特的音樂錄像及廣告片。這位堅信「驚喜唔一定要用錢堆砌」的創作人，將坐陣今年極品廣告片的加料節目，分享如何以影像打動人心。