逢星期六下午三點到五點﹐我哋都會嚟到新蒲崗爵祿街招商永隆銀行門口開設社區回收推廣站﹐回收廢塑膠。 塑膠好好用﹐人人屋企有﹐但係點樣處理廢塑膠就費思量。如果你順手丟落垃圾桶﹐即係丟落堆填區。咁呢啲廢塑膠就要幾百年才可以分解﹐期間堆填區唔可以耕種﹐更加唔可以起樓﹐仲會污染土地和海洋。所以與其丟落垃圾桶﹐不如攞嚟倂我哋循環再造﹐造番新塑膠。 『黃大仙社區回收中心』係慈善團體──東九龍居民委員會向環保及自然教育基金申請嘅項目﹐做嘅係回收乾淨乾爽嘅廢塑膠。我哋收得嘅廢膠塑膠﹐分類後將交俾環保署認可嘅回收再造商﹐打成膠粒﹐再造新塑膠。 究竟我哋回收啲乜嘢塑膠？如果你有冇用嘅膠樽﹐無論係水樽﹑洗頭水樽﹑洗潔精樽﹐甚至係煮餸用嘅油樽﹐或者有啲冇用嘅塑膠容器﹐例如：膠袋﹑膠箱﹑膠桶﹑膠盒﹐或者有啲冇用嘅塑膠文具﹑光碟﹑錄音帶﹑錄影帶﹐甚至係乾浄嘅膠膜﹐都可以攞嚟俾我哋﹐循環再造﹐造返新塑膠。 只要你登記做我哋嘅環保會員﹐你就會有張積分咭，紀錄你每次攞嚟嘅塑膠重量﹐儲夠重量，可以換取禮物，包括廁紙﹑香米。