第 65 屆體育節重點活動–第四屆香港賽車運動節將於 8 月 20 日至 21 日（星期六至日）喺數碼港商場舉行。好多人以為賽車運動員只係坐喺駕駛座揸車，無大動作，但你知唔知佢哋點樣練習呢？ 賽車係一項對體能要求極高嘅運動。頂尖賽車運動員嘅心跳率同肺活量要求極高，同馬拉松跑手差唔多，所以佢哋要持續鍛鍊心肺功能，例如游水、跑步同埋踩單車等。佢哋平時仲需要針對手臂、頸部同埋心胸部分進行高強度重量訓練，等佢哋足以應付比賽期間嘅高速轉彎同軚盤操作。除咗體能同埋力量之外，佢哋仲要練習手眼協調、專注力同即時反應，確保佢哋喺緊張刺激嘅比賽入面可以及時作出正確決定，保障自己同埋其他車手安全。所以我哋絕對唔可以睇少賽車運動員背後嘅付出呀！ 除咗早前喺巡迴展覽安排嘅電競賽車體驗專區外，香港汽車會將會喺第四屆香港賽車運動節期間舉行電競賽事表演賽、展覽攤位、戶外賽車展覽同埋賽車運動工作坊，由合資格嘅工作人員同埋香港賽車運動員分享同詳盡介紹香港賽車運動發展，例如香港汽車會歷史同埋賽車器材等。透過多元化資訊同體驗，擴闊市民對賽車運動嘅認識。 透過體育節網站報名系統登記嘅參加者將於活動當日獲得體育節紀念品乙份。名額有限，先到先得，額滿即止。 登記連結：https://fos.hkolympic.org/zh/65-automobile （預先登記名額：每日 400人）