大家有冇發現自己嘅社區係最近幾年變得有小小不一樣？ 有人會為社區做區報、有人會做導賞團、有人會係街頭畫畫寫字影相⋯⋯ 突然間，大家不約而同地嘗試創作，無論開始嘅初衷係咩，相信「珍惜」係其中一個令大家開始創作嘅原因。 好一天繪本見 (The Beautiful Pages) 會喺 11 月 30 至 12 月 5 日深水埗合舍舉行社區繪本展 "How’s everything?"，五位繪本作者希望藉今次機會同大家交流對社區、對創作嘅睇法；都希望將本地繪本帶到入大家嘅生活當中。 繪本，對香港讀者嚟講可能比較陌生；對於五位繪本作者嚟講，繪本唔單止係兒童讀物，更加係人同城市嘅連結。用繪本講故事、去堅持創作繪本，都係因為有想珍惜嘅物、事、人。 希望呢個展覽除咗係一個創作者同觀者嘅交流會，都係一個畀珍惜自己社區、珍惜自己成長地方嘅人取暖嘅火爐。