11月14日，以女主唱黃昭允（황소윤）為核心，韓國獨立樂隊 새소년 SE SO NEON 將於九龍灣Music Zone舉行歷來首場香港音樂會。 組成初期已經靠玩live喺弘大一帶成為話題人物，2017年發表出道作〈長夢 A Long Dream〉後，唔止獨立樂迷熱捧，圈內多位音樂人都出力幫推，SE SO 首張專輯《夏羽 Summer Plumage》發布音樂會上，就有 hyukoh 主唱吳赫擔任嘉賓；同年砰一聲贏埋韓國音樂大獎嘅最佳新人，SE SO 出道時風頭之盛，連坂本龍一亦專誠走去睇live，後來仲請人食飯po埋上IG。 SE SO NEON 喺韓文中可譯作「新少年」，來自昭允行書鋪時見到嘅一本同名舊雜誌 —— 唔知係有心定無意，呢個名又真係呼應到 SE SO 用復古元素去玩新風格嘅創作方針：藍調、爵士、迷幻搖滾、80年代new wave、post punk，昭允一一手到拿來，捏成屬於 SE SO NEON 嘅獨特形狀，令當地樂評一度以「曲風破壞者」去形容。 開咗個靚頭，SE SO 卻因兵役等原因而要作人員調動，昭允喺休團期間以 So!YoON! 名義推出個人大碟，展現出駕馭R&B與funky曲式嘅另一面相，促成後來與 Phum Viphurit 、DEAN、Japanese Breakfast 甚至男團 BTS 成員 RM 合作；隨住曝光率上升，以為標誌造型嘅 So!YoON! 喺偶像男團與活力妹豬橫行嘅K-pop市場上，其中性搖滾氣質愈來愈顯眼，愈來愈多fans。 確立個人風格後，So!YoON! 喺2020年帶住全新陣容嘅 SE SO，以第二張專輯《Nonadaptation》回歸，跟手發表樂隊目前最好成績嘅單曲〈亂春 NAN CHUN〉，喺Spotify上已累積過千萬播放。雖然撞正covid，SE SO 卻喺疫情下逆市衝入西方indie圈，Reddit 上到處有人開板討論之餘，巨頭 Pitchfork 更將《Nonadaptation》與 Tame Impala、Phoebe Bridgers 等一同納入該年度 Best 35 Rock Albums。 經過數首單曲熱身後，새소년 SE SO NEON 今年展開世界巡迴，早前公布九月舉行嘅北美及歐洲場次後，今日正式公布亞洲場次，除咗返啅嘅台灣泰國日本外，終於有香港份喇。