唔經唔覺，原來搞土墟都差唔多係成年前嘅事 上次【土墟之年初四咁嘅樣】，我哋臨時轉陣，離開「美華11B1」，臨急臨忙聯絡土瓜灣小店友好，又傾又砌，卒之比我哋揾到十幾個點願意借地方比我地擺檔／寄賣。 唔夠一個星期，籌備一個全新模式嘅市集，面對住一個又一個嘅未知。好彩嘅係，結果大家似乎都幾鍾意呢個「非集中」形式嘅市集。 所以 我哋決定繼續咁玩 今次集中於土瓜灣牛棚旁邊嘅十三街，透過散落社區呢個「非集中」形式嘅市集，配合導嘗團，更連結附近不同角落嘅友好小店，等大家逛吓土墟嘅同時，方便規劃行徑去探索土瓜灣，周圍行吓食吓影吓相。 土瓜灣車房林立， 由鴻福街到長寧街到十三街，通街都係車房。 但係大家又知唔知究竟車房入面有咩乾坤？ 所以今次我哋化身爛口發、交通燈同吳準少，問咗幾位劉定堅，借咗幾間車房。 一齊「精裝追鋪仔」。