夏日炎炎☀️，我哋為各位大朋友小朋友準備咗一連串輕鬆又好玩嘅活動😎冇錯！今年七月至八月，國際綜藝合家歡又返嚟啦，今個暑假為你哋帶嚟線上線下嘅奇幻體驗！

雜技、魔術、舞蹈、偶劇、音樂劇場及多媒體演出……節目多籮籮！偷偷話你知，今年有喺國内外獲獎無數、載譽歸來嘅中國雜技團，為大家帶嚟結合創新技術同傳統技藝嘅《青春ing》，仲有加拿大美人魚劇團嘅黑光布偶劇場《彩虹魚的海底大冒險》🐠，意大利TPO劇團嘅互動多媒體舞蹈《小豆丁大手筆》等🌳⋯⋯總有一款啱曬你一家大細嘅口味👪

仲等？🎉快啲去城市售票網售票處拎返本小冊子或者去IAC網頁www.hkiac.gov.hk 了解更多！等我哋陪你一齊過一個開心難忘嘅暑期啦

🌟🌟5月10日！冇錯，聽日就開始賣飛啦！想知今年嘅節目有幾精彩？等我哋即刻介紹吓🌟🌟

🤹青春ing：中國雜技團雲集多位「超人」，將施展「超能力」，表演各種高難度雜技：單車雜技、高拐同埋轉碟等，緊張刺激到你會「哇」出聲！

💫魔法隨意門：香港著名魔術師甄澤權首個創作嘅魔術劇場，穿越多個家傳戶曉嘅童話故事世界，施展魔法排除難關，尋找失蹤嘅囡囡。曾參賽《全美一叮》嘅日本幻象大師原大樹(Hiroki Hara)亦會作特別嘉賓參與演出，到時候可以一睹佢一戰成名嘅魔法。

🌳小豆丁大手筆：意大利 T P O 劇團帶來沉浸式互動舞蹈劇場，利用互動數碼投影技術，邀請你一齊郁郁手郁郁腳嚟創作你嘅理想城市。想要花草樹木？想要高樓大廈？全憑你嘅想像！

👶奇幻「柔」樂園：ASSITEJ 國際卓越藝術獎2021得主、瑞典舞蹈家達莉亞．艾切．泰蘭特創作呢個別樹一幟嘅寶寶舞蹈演出。 舞台上佈滿毛茸茸、軟綿綿嘅裝飾，最適合寶寶自由探索，眼看手又動，解鎖無邊想像。

🥚動物扭蛋機：被封印在扭蛋中的動物，將由你親手解封！稻田身體劇場邀請大小朋友化身動物學家，從扭蛋機扭出動物嘅秘密。探究動物之間嘅奇妙化學反應，係朋友仔定係敵人呢？呢個係一個扭蛋遊戲，亦係一堂以舞蹈演繹嘅生態課！

🐠彩虹魚的海底大冒險：加拿大美人魚劇團擅長改編兒童文學，今次演繹馬克斯．菲斯特嘅暢銷同名繪本系列，令彩虹魚由圖書游到舞台，栩栩如生嘅螢光海洋生物布偶將帶大家潛入海底世界歷險！

💭打尖忍者尋夢記：敲擊樂家樊麗華設計演出，聯同最擅長與觀眾互動嘅敲擊樂團體「打尖」，召集各位小朋友試玩不同敲擊樂，一齊叮叮咚咚，深入認識世界各地嘅敲擊文化，體驗節奏無遠弗屆嘅感染力。

🎹爵士號飛車：來自比利時嘅嗓梭爵士樂團將現場演奏爵士史上的頭號「怪人」Thelonious Monk獨特嘅爵士音樂，仲有以Thelonious爲主嘅動畫投影！大小朋友可以一邊聽即興又自由嘅爵士樂，一邊跟住節奏搖擺。咁樣輕鬆又好玩嘅多媒體演出不容錯過！