從夢景取材，來自京都嘅獨立唱作人青葉市子喺19歲發表首張大碟《剃刀乙女》，確立以木結他與人聲二重唱嘅簡約配置。其有如森林精靈吟唱嘅歌聲，加上清透暖流一般嘅另類日式民謠質感，既吸引Cornelius 小山田圭吾 、細野晴臣等神人搭檔演出，亦喺歐美得到廣大迴響，受邀與 Black Country, New Road、Japanese Breakfast、Weyes Blood 等單位同台；而佢喺2020年發行嘅代表作《Windswept Adan》，就得到樂評頻道 The Needle Drop 9分高評價。

憑藉一人一結他嘅演出方式喺世界各地樂迷之間贏得口碑無數，然而擅長管樂，曾經喺錄音中親自演奏鋼琴、單簧管、手風琴、長笛等元素嘅青葉氏，其實對古典樂向來有濃厚興趣。

2022年，佢就與英國弦樂組合 12 Ensemble 喺倫敦 Milton Court 音樂廳舉行合奏演出；弦樂襯托下，青葉氏發揮出更具層次嘅氣場，淨係上Youtube已經feel到浸仙氣。好彩我哋都唔使得個恨字：2025年2月24日，青葉市子將會再度訪港，並與香港管弦樂團 HK Phil 多位團員合作，喺西九文化區戲曲中心大劇院帶來另一場限定演出。

青葉市子作品雖然結構古典質樸，卻可以喺可緩可急嘅節奏中引導聽眾情緒探索，自帶一股令人唔捨得轉歌嘅靈性詩意。隨住作品增加，青葉氏逐漸加入更多樂器以及大量環境音效（佢曾經喺訪問表示每次到訪不同城市都會抽時間記錄當地雀鳥嘅聲音），營造出充滿療癒感嘅魔幻氛圍，透過現場感受時尤其深刻。如果你有參與今年初佢與 Slowdive 嘅聯合專場，相信都不會忘記嗰種純粹體驗，明年二月，唔好錯過青葉市子與古典音樂家現場合奏嘅珍貴機會！