九十年代初以〈The Drowners〉、〈Animal Nitrate〉等黃金單曲迅速爆紅，Suede 喺1994年推出嘅第二張大碟《Dog Man Star》走暗黑華麗嘅實驗史詩風格，唔單只係Britpop年代影響力深遠嘅鉅作之一，亦位列英國搖滾史上最具代表性嘅專輯。

經歷過解散重組後，Suede 自2013年回歸專輯《Bloodsports》起，不論喺錄音室抑或舞台上展現出令人意外嘅生猛力量；兩年前發表嘅《Autofiction》融入post punk元素，野性程度直頭係新band咁款，依然能令樂迷驚喜。

喺Britpop四巨頭之中，Suede 向來係與香港緣份最深嘅一組，由99年訪港人氣迫爆會展玻璃上新聞，到後來主音 Brett Anderson 多次訪港訪到有人傳佢黃埔有層樓，每次都係帶來傾力精彩演出。今次係Suede第一次玩Clockenflap，將為樂迷帶來超足本90分鐘嘅特別加長版演出！無論你係新舊fans，都應該超期待週六晚喺維港同佢哋現場大合唱〈Saturday Night〉嘅珍貴時刻！