團名出自北京 post-punk 名團 P.K.14 一句歌詞，亦從 ELLEGARDEN、甜梅號、Mac DeMarco 等單位取經，來自台灣高雄嘅「巨大的轟嗚」由結他手 亮廷、低音結他 侯柏第、鼓手 黃堂軒 和 主唱 王之佑（aka Leo王）於高中年代組成。無論係創作抑或舞台上，巨鳴都體現出有如 Jon Spencer Blues Explosion 一般帶有藍調色彩嘅暴烈朋克力量。

成名作〈登鸛雀樓〉以中學課程必修同名唐詩為靈感，唱出「我不想上樓／不要啟蒙我／讓我當白痴」嘅少年獨有鬱怒；其他曲目諸如〈媽媽我要吃肉〉、〈一分耕耘沒有一分收穫〉、〈靠腰毛里森〉亦係表面令人莞爾，實質嘻笑怒罵嘅勁作。四人狂躁爆汗嘅表演風格，更為巨鳴贏得2015年金音獎嘅年度最佳現場演出，然而翌年樂團喺完成唯一大碟《老子有的時間》巡演，做訪過紐約、波士頓、首爾、東京、大阪、吉隆坡、香港等城市後就進入無限期休團。

直至2022年底，巨大的轟嗚喺已成為金曲獎級別饒舌歌手 Leo王 嘅《音樂戰艦》音樂會上突發合體，以〈登鸛雀樓〉作Encore演出，再喺今年五月舉辦「突然決定去《登鸛雀樓》十週年演唱會」正式限定重組，更會首次嚟到香港登上 Clockenflap 舞台演出！