喺電音圈子浸淫超過35年嘅 Dave Clarke，早年因 post punk 樂隊 The Damned 而成為樂迷，少年時期喺雜誌上發表過其中最早幾篇 Aphex Twin 樂評，後來由英國布里斯托小店打碟打到倫敦 Fabric、柏林 Berghain、邁阿密 Space等神級俱樂部，亦曾參演 Tomorrowland、Sónar、Glastonbury 等大型音樂節，地位超然。佢於2001年發表嘅混音名盤《World Service Vol. 1》 被 Resident Advisor (RA) 選為 2000年代嘅十大mix 之一，而以製作人身份為 The Chemical Brothers、New Order、Underworld、Boys Noize 等單位混音同樣首首經典！中意聽 techno 嘅，梗係要嚟 Clockenflap 現場朝聖一下呢位被BBC電台傳奇 John Peel 激讚，稱之為 Techno 界大亨嘅人物。