因為一首至今在YouTube已獲過千萬觀看次數嘅〈我愛你〉而引起樂迷矚目嘅日本新銳樂團 Cody・Lee(李) 近年海外人氣持續攀升，以充滿速度感嘅懷舊風格喺台灣、香港以至美國吸納唔少新fans。對中文似乎情有獨鍾嘅佢哋，更遠赴台灣拍攝〈在夜市再見〉MV，年初更邀曾與草東沒有派對合作嘅台灣導演劉立執導〈烏托邦〉MV。2022年推出首張專輯《心拍数とラヴレター、それと優しさ》，除咗早期經典〈江ノ島電鉄〉外，〈異星人と熱帯夜〉、〈世田谷代田〉等新曲同樣大受歡迎，佢哋今年推出主流出道後第二張大碟《最後の初恋》，繼先前造訪台北台中曼谷等城市後，將會喺 Clockenflap 2024 作香港首演，fans們梗緊係要把握機會嚟睇live啦！