早期以自家DIY方式發表個人作品，本地唱作人 Serrini 喺 2016年以一首姿態文藝擁抱MK嘅〈油尖旺金毛玲〉爆紅，漸漸建立如宗教一般嘅fan base。2017年發表製作成熟嘅《Don’t Text Him》後，Serrini 搵嚟合作其中一首〈溝晒啲仔〉嘅 Alok 監製，以走黑暗電子風格嘅大碟《邪童謠》突破「騎呢小清新」標籤，規格宏大之餘夾滿憤怒與毀滅情緒，獲得台灣第10屆金音創作獎「海外創作音樂獎」獎項。過去數年，Serrini 先後發表〈網絡安全隱患〉、〈我在流浮山滴眼水.jpg〉、〈樹仔〉、〈不冷淡不熱情〉等多首人氣派台歌，亦曾為 per se、黎明、林家謙、Moon Tang 等藝人填詞，晉身香港流行樂壇最具辨識度嘅女歌手之一，擁有博士銜頭嘅佢除咗設獎學金回饋社會，也開設「樹店」分享音樂、藝術品、書籍與畫作等，屬於真正多瓣數才女。今年推出全新大碟《Rage in Peace》並即將首次亮相 Clockenflap，將會係條女今年少有嘅大型公開演出！