身兼創作歌手、唱片製作人、聲音藝術家等多重身分，柯泯薰 Misi Ke 出道10年間活躍於台灣各大演出場地和音樂節，並確立一人一結他嘅獨立唱作人形象，以及寫下成名作〈遊樂〉（為第28屆政大金弦獎主題曲）。早期嘅民謠風格別具靈氣之餘又有佻皮幽默，加上現場見證 Misi 嬌小身軀所能夠爆發出巨大溫暖治癒力量，唔只樂迷就連行內人都印象深刻，多次入圍金曲獎、金音創作獎、新加坡Fresh Music等音樂獎項。

除咗招牌撼動人心嘅人聲結他合奏外，Misi 各階段作品都會加入不同元素，交出多首代表作如〈拋〉、〈等妳擁有勇氣〉、〈旅鳥〉、〈下一頁〉等。擅長跨界嘅佢更持續與不同音樂人合作包括〈另一個時空的你〉嘅吳青峰以及〈哭哭臉〉嘅饒舌歌手呂士軒，舊年仲為由日本 math-rock 樂團 LITE 及 DJ DÉ DÉ MOUSE 組成嘅迷幻搖滾樂團 Fake Creators 當主音，發行迷你專輯《Rain Dreams》。籌備良久，Misi 即將推出第四張個人專輯《好好的 BE GOOD》，更會早過台灣發片專場搶先嚟 Clockenflap 開唱，今次亦係佢喺香港歷來最大型嘅演出，fans們記得嚟捧場喇～