香港獨立音樂編年史上不可或缺嘅「意色樓」，分別喺2006年及2012年發表《相識但陌生》及《公開跟秘密之間》兩張經典大碟，將人際愛恨忐忑、情色性慾陰暗面等感情刻劃於〈剎那快慰〉、〈懷抱內拆穿你〉、〈小鹿亂撞〉等多首作品，現成員為創團主唱梁穎禮、結他手陳浩南、低音結他應嘉樂、鼓手Kitt Lau。沉寂一段日子後，2021年推出驚喜單曲〈恍然嚮往的瞬間〉，被 DAVID BORING 張醫生撰文形容為「清新可口，直頭係秋高氣爽」，換個心態再掙扎，進入另一階段嘅意色樓近年重新活躍於舞台上發射本我的訊號，不論新舊樂迷繼續為之驚艷。

以暴烈結實嘅 post-hardcore 架構為底蘊，搭上具有文學節奏嘅低吟吶喊，而阿禮演繹「唱歌」呢回事嘅方式，又有心將詞義與歌意兩者區間，既如梅迪斯@識你佳 所講「字詞亦只是黏附在聲線上的寄生品」，又如樂隊自我介紹所寫「音符跟文字吵架」，矛盾衝突得嚟爽歪歪。聽意色樓若果唔打開對耳成件事咁聽，就好似用iPhone睇 David Lynch 一樣咁錯配，係要現場用全身皮膚去聽live先最啱數。今次有意色樓首度參演，喺 Clockenflap 維港旁嘅廣闊環境下與你我他碰撞，究竟會係一場點樣嘅音樂體驗？我哋都很是期待又好奇。