來自西安四人樂隊 FAZI 法茲，前身叫 The Fuzz 嘅佢哋，名字本身已承載毛噪雜音 (fuzz) 嘅字義，又愛 Krautrock 果種德式前衛搖滾律動，自自然然形成一套簡約剛硬嘅 post-punk 美學，成名單曲〈控制〉就包含向 Ian Curtis 致敬之意。以 P.K. 14 主唱楊海崧出馬製作首張大碟《誰會做奔跑的馬》為起點，法茲逐步建立出高壓全場緊迫而精神飽滿嘅招牌風格，樂迷分布由國內逐漸擴散至海外，曾受邀到英法德意日等國巡演。

2022年發表收錄〈假水〉、〈熱死荒梁〉等佳作嘅第五張大碟《折疊故事》後法茲再次備受國內外音樂圈矚目，佢哋現場演出唔單只糅合咗神秘東方元素，主唱劉鵬嘅招牌「打拳」舞台風格令佢哋無論視覺定聽覺都令人一睇難忘。嚟緊首次登上 Clockenflap 舞台作歷來最大型香港公演，好想聽佢哋現場控制我控制你！