Update 3/4/2026: 農夫再開心宣佈加母親節日場
方便大家睇完騷重可以慶祝母親節

農夫前日公開發售第二場《農夫全香港最好笑嘅演唱會》門券，一小時內全部售罄，這個消息，令到陸永及C君都覺得有點受寵若驚，並且開心宣佈
再加開終極母親節日場！4月8日Klook率先訂票，4月9日Urbtix公開發售，仍想買飛的歌迷一定要留意了。

C君直言，16 年前紅館開騷，只做一場，沒想到16 年後，可以開三場，進步了3 倍(300%)，「呢個我估三場暫時係我哋體力極限啦，紅館要多好多力。咁點解開日場，因為嗰日係母親節，等大家下午嚟睇完騷，晚上可以開開心心陪阿媽。咁如果有人睇完唔開心，都一樣晚上可以陪阿媽，做人最緊要孝順嘛。哈哈。」

問到陸永，係咪一早搵麥玲玲算過，今年行運，所以今年一開就爆，一開又爆，陸永笑言，「冇呀，玲玲仲算緊佢有冇飛俾朋友，但係師傅好好，話會力撐我地每場都出現，哈哈。」
外間不停有人話搶唔到飛，所以大會公佈，第三場會有超過六成門票公開發售，希望更多人搶到，C君話，「冇試過搞咁多場咁大型嘅演出，淨係平時睇新聞，啲歌手朋友開騷，話自己都唔夠飛，要俾錢去公售日搶飛返來應酬屋企人同朋友，原來係真，原來呢啲事都會發生係我哋自己身上，好奇妙 。」
第三場，C君笑言，自己母親、外母呀咁一定嚟支持，「最好完騷後，主辦搵間又靚又好食嘅餐廳搞個慶功宴啦，咁我哋咪可以帶埋老母、外母去食飯，完show兼祝大家母親節快樂囉，哈哈。」

----------
Update 25/3/2026:

農夫出道26年再踏紅館 「全香港最好笑嘅演唱會」

今日公售，一小時賣爆 開心宣佈加多一場！

農夫（Fama）出道26年，繼16年前首度登上紅館舞台後，今年再次回歸，宣布舉辦一場《全香港最好笑嘅演唱會》。5月8 日門票今日（25日）正式公開發售，反應極度熱烈，一小時內即全數爆滿，農夫隨即開心宣布加開5月9日一場，誓要以笑聲席捲紅館。

對於門票火速售罄，C君（鄭詩君）笑言今次演唱會的口號與主旨正是「今日唔知聽日事，笑得一次得一次」，非常感恩樂迷的熱情支持。16年前我哋只係開一場，今次可以加多一場，進步咗100%！一倍！希望到時大家人人場場時時刻刻都開開心心！」

陸永（陸永權）則認為票價「抵睇」是今次加場的關鍵。他笑說：「我覺得最開心係觀眾，好多朋友都同我講，好期待呀，咁平嘅！哈哈。我估加場原因，係今次票價令大家好開心，價目相宜。」他更打趣道：「票價令大家開心，令我哋唔開心，係冇問題，呢個騷絕對係為大家而做嘅！哈哈。」

隨著加場消息公布，C君透露要開始「練啲嘢」備戰。他表示除了正密鑼緊鼓構思能令大家開心的互動環節外，亦希望大家能以「考古、悼念」農夫的心態入場觀賞，「大家帶住一種考古悼念嘅心態嚟睇，都已經好笑㗎啦。」他更提到派台的新歌《歡迎玩謝我》，正是為演唱會度身訂造的主題曲，「大家去聽下啦，就知個騷其實中間我哋都會除咗玩，亦有啲『行嘢』嘅。」

重提16年前首次紅館個唱，C君感觸道：「啲人成日問，16年後再去紅館，今年係咪好大意義？其實有幾多人記得我哋16年前去過紅館呢？哈哈哈.....意義來來去去都係嗰句，很多人需要開心，我哋好想俾大家一晚快樂，可能你入到嚟唔覺得好笑，但至少你可能忘憂, 唔洗𠝹櫈三個鐘。」他更借用歌名笑說：「大家夾錢玩得謝我兩個，已經夠開心啦。」

陸永揚言希望入場觀眾能突破平日睇演唱會的體驗，被問到會否為演唱會操肌，陸永妙語回話：「本身有咪練多啲。我哋本身唔係呢科，冇理由開呢飯㗎？」C君則幽默補刀：「練緊㗎啦，練個腎，腎肌，呢樣好呀，夠健康。」陸永笑稱自己屆時會表演「腎功能」，「不會不停去廁所」，又賣關子表示無論練出甚麼成果，定必在演唱會上呈現。

至於嘉賓陣容，農夫坦言知道現今社會觀眾對嘉賓的期待有時甚至超越演出者本人，但他強調今次演出嘉賓別具心思：「今次呢個騷，真係請得最多朋友會嚟，上唔上台，到時話你知。成件事我哋希望係，每個嘉賓你會 feel 到到場係有原因嘅，佢哋係 part of 表演者多過嘉賓。」

----------

Update 4/3/2026:

香港地道嘻哈組合農夫（Fama），由C君（鄭詩君）與陸永（陸永權）組成，2000年出道至今，由「地下Rapper」發展到成為「全面創作人」，誓要全力創作一個能夠令觀眾跳一晚、笑一晚嘅演唱會。

回顧農夫的紅館之路，他們早在2010年6月已舉行了首個紅館個唱《Down to Earth演唱會》。當年他們以「太空人」及「野人」造型從天而降，留下經典回憶。相隔16年，在出道第26個年頭，他們終於再度獲邀以「農作物」的造型重返紅館這個夢寐以求的舞台。


相隔16年的第二次紅館騷，農夫融合音樂及棟篤笑，命名為 《農夫全香港最好笑嘅演唱會》 ，顧名思義，主菜是一場大型「集體開心派對」。農夫笑言：「我地嘅演唱會唔敢話最好睇、最好聽，但好可能係最好笑，因為人地啲演唱會係唔講笑嘅！今次目標就係希望觀眾入場，起碼能夠獲得一個開心嘅晚上。」為了令觀眾開心，農夫設計了很多全場「一齊玩」的環節。C君解釋：「只要觀眾開心，歡迎大家入場玩到我謝，由開show玩到鳴謝。」

這次演唱會的海報率先「玩自己」。海報所見，C君與陸永竟然被「埋葬」在泥土之中，只露出兩顆笑容燦爛的人頭，四周更種滿了西蘭花、紅蘿蔔、生菜等新鮮蔬菜，畫面既搞笑又詭異，像是「入土為安」，陸永笑說：「係種生機，我哋一路種自己嘅作品，終於等咗16年先有第二次紅館騷，算有啲生機，多謝大家咁多年嚟幫手栽種我哋。」

雖然外間一望就認為他們今次這種超現實的海報是AI合成技術的產物，但農夫話你知，拍攝當日團隊可是「嚟真嘅」！工作人員真的動用大量真泥土將兩人身體覆蓋，只露出頭部。兩人雖然被泥壓身，但仍要保持專業笑臉，非常認真。

眼見兩人的造型，少點幽默感都難以接受。但農夫就最擅長將忌諱變成笑話，C君更抵死地自抽水：「啲人話兩個死人頭，今次咪種返生佢。」

出道26年，農夫由當年揸住支咪在地下場地Rap，到今日成為廣告商寵兒、大型活動金牌司儀，他們依然保持著那份「貼地」的親民感。這個「用泥土種出嚟」的演唱會，既代表了他們對音樂的默默耕耘，風吹雨打也堅強生長的理念，又展現做人要真！唔用AI代替，親力親為！寧願「玩謝自己」也要娛樂大眾的敬業精神。到時入場的觀眾，記得準備好你的笑聲，齊齊「淋水」，等農夫這場又好笑嘅演唱會」茁壯成長！

----------

Update 6/10/2025:
農夫係廣州草莓音樂節中宣布2026年5月會係紅館開演唱會

----------
農夫Fama喺剛剛完成嘅3場壽臣演唱會表示有意2025年喺紅館開 (但未入紙)！由於紙都未入，就算拎到都極可能年尾！多多留意！

．請勿誤信非官方售票渠道

Follow 埋 Timable 演唱會 FB 專頁：
https://www.facebook.com/timable.hk.concerts