考完DSE又或者搵緊工嘅青年朋友，機會嚟喇！勞工處「展翅青年就業計劃」將會舉辦青年搵工日，專為15至29歲、學歷喺副學位或以下嘅青年而設。當日會有27間公司齊聚現場，涵蓋運輸、航空服務、零售、飲食及物業管理等行業，提供不同全職及兼職在職培訓職位，參與僱主仲會即場招聘及進行面試。計劃學員可以即場拍攝見工相，展現你自信專業嘅一面，為你搵工之路添上動力。

「展翅青年就業計劃」亦邀請到MC張天賦及吳安儀出席活動，同大家分享佢哋嘅發展事業嘅奮鬥經歷同秘訣。計劃學員可以優先入場，更有機會直接向嘉賓提問交流，所以大家記得當日早啲嚟登記成為學員，睇吓有無適合你嘅工作，之後再一齊聽嘉賓分享啦！另外，活動亦設有就業資訊閣、課程示範及就業講座，介紹唔同行業嘅特色同適合學員報讀嘅培訓課程，為你打開通往各行各業嘅大門，唔好錯過呀 !