話說早排有香港唔同大學嘅歷史系不約而同咁聯絡我哋，話有大批歷史書需要出清，希望可以為呢啲書搵到第二生命。既然係大學歷史系藏書，唔洗問都知會有好多好嘢啦～咁我哋當然二話不說就應承。於是幾經籌備（波折），我哋終於準備好喺獵人同獅墨書店俾大家上嚟尋寶！

點解係好Chur市集？兩件事：1. 今次總共有大約【1800本書】，有大有細，有厚有薄，淨係搬運、標價同鼻敏感都已經折壽不少（但有積陰德，應該），是為籌備Chur。
2. 學者收藏同研究用書，有大路主題，當然都有冷僻題材，好多店長我聽到無聽過嘅研究，無論你嘅興趣有幾冷僻可能都會喺度搵到寶，是為主題Chur。【主題Highlight】
如果你對以下主題有興趣，呢次市集你係絕對絕對絕對絕對唔能夠錯過：潮州研究｜湖南研究｜廣州研究
中國經濟史｜道教研究｜地方史
地方志書｜企業檔案｜民國史料隨住下一批藏書陸續送到，我哋都會【不斷補書】，所以記得嚟多幾次～市集由即日起擺到【9月7號】，喺獅墨同獵人書店都有分別陳列，可以去曬兩邊！