音樂劇社區推廣計劃

音樂劇普及講座及演出示範
沙沙返嚟油尖旺喇！

演戲家族喺2021-2024年度「十八有藝——飛越桐油的油尖旺」計劃曾經演出音樂劇《當家貓遇上貓》，講述家貓沙沙同主人失散，喺油尖旺遇上唔同嘅貓，搵路返屋企嘅故事。演出大受歡迎，「油尖旺街角存希望」嘅歌詞更唱遍油尖旺區！ 貓貓沙沙同阿角今次終於返嚟屋企同大家再見面喇！今次演戲家族為油尖旺街坊帶嚟 3 場「音樂劇社區推廣計劃——音樂劇普及講座及演出示範」， 演戲家族駐團作詞家唐家穎 (Serena) 將會同大家講解音樂劇嘅知識，等各位大人、小朋友都可認識多啲音樂劇哩種咁精彩嘅表演藝術！除咗可以識多啲之外，仲有演員現場演繹音樂劇《當家貓遇上貓》嘅歌曲，大家可以現場親身感受音樂劇嘅獨特魅力，同重溫《當家貓遇上貓》帶嚟嘅感動！11月21日場次更會同場舉辦《2021-2024年 飛越桐油的油尖旺計劃——結集》（暫名）嘅發佈會，結集回顧、總結咗演戲家族 3 年嚟喺油尖旺區舉辦過嘅活動，仲有各位參加者、導師嘅感想，同埋音樂劇《當家貓遇上貓》嘅劇本同樂譜，非常有紀念價值！