今年係港島徑啟用40周年，大家想唔想為港島徑出一分力？今個星期六（10月18日）一齊嚟港島徑(第一段)，幫手搬維修山徑嘅物料！

我哋誠邀精力充沛嘅山友，星期六行過路過太平山港島徑(第一段)，可以去夏力道嘅物料存取處，幫手拎1至2公斤維修山徑嘅物料，行山去H007至H009標距柱之間嘅三個卸下處放低，之後嘅山徑維修活動就有得用。物料存取處同卸下處都有清楚標示，唔使擔心揾唔到！港島徑(第一段)嘅風景靚，景點多，上星期介紹嘅松林砲台都喺活動地點附近，大家記得約埋朋友仔一齊嚟行山幫手搬啦！唔該晒！*活動以自助形式進行，需要「幫手搬」的物料於星期六早上八點前已放置於存取處。當物料全部運送完畢活動亦即結束。