你識得本港幾多間古蹟廟宇？佢哋唔單止係歷史建築，仲係社區文化嘅中心。「2025年廟宇文化節」帶你深度探索委員會直轄24間廟宇嘅秘密，一齊展開一場「廟宇漫遊」文化之旅！

由民政及青年事務局與華人廟宇委員會合辦嘅「2025年廟宇文化節」，今日（11月19日）喺沙田車公廟舉行新聞發布會。華人廟宇委員會文化及宣傳小組主席黃成益博士, MH及財務及管理小組主席黃光耀先生, MH介紹今年廟宇文化節嘅精彩內容。此外，大會特別邀請咗幾位嘉賓，包括翟月女士分享非物質文化遺產「盒子燈」嘅製作；胡敬清女士及巫蓉香女士介紹及示範傳統皮影戲；仲有鄒興華教授分享廟宇導賞及訓練學生大使的心得。發布會之後仲有由鄒教授帶領嘅傳媒導賞團，深入了解車公廟嘅歷史同埋建築特色。