Update 3/4/2026:

ToNick 5.1 玩轉 AXA Wonderland 變身「暖男洗碗機」解構男人浪漫

闊別香港專場舞台超過兩年，人氣樂隊 ToNick 終於宣佈回歸！今次佢哋揀喺5 月 1 日勞動節開騷，於Backyard @ AXA Wonderland舉行《Backyard Live: ToNick 我是你的洗碗機》音樂會。今次唔止係一場戶外 Band Show，ToNick 四子更決定將演藝圈最神祕嘅「後台禁區」搬上台，邀請全場觀眾一齊參與「開騷拜神儀式」，將現場變成大型「自己人」屋企派對

從憤怒 Band 仔進化「暖男洗碗機」：見證 ToNick 成長路

自 2024 年九展演唱會後，ToNick 雖然一直有喺各大音樂節見大家，但樂迷最恨嘅始終係近距離接觸。等咗兩年幾，呢班曾經滿腔熱血嘅「Band 仔」已經踏入人生新階段，由「憤怒」變做「愛惜」。今次演唱會主題《我是你的洗碗機》，正正係 ToNick 四位成員（恆仔、小龜、Ryan、晨曦）步入「成熟男」嘅心聲：「今次嘅主題係講男女關係，有好多人就算變到阿伯都唔識得同另一半相處，成日吵吵鬧鬧又或者不瞅不睬。點成熟地處理關係並不在於年紀，而係在於心態。到時入場睇吓我哋有乜分享啦！其實ToNick都冇咩大改變，都會keep住做音樂出show、同其他單位合作。我哋同fans互相睇住對方成長，依家同佢哋溝通嘅方法亦都唔同咗，唔一定淨係show先見面，可以平時都互相關心吓！」

ToNick「某成員」笑言男人去到某個年紀，最重要係識得「既來之，則安之」，只要另一半開心，屋企就快樂，世界就和平。所以我哋已經做好洗碗抹地、任勞任怨嘅覺悟。

Backyard 新模式「超近距離」：只限一千人同步用愛發電

今次 ToNick 再度選址 AXA Wonderland，但就玩轉新花樣，利用 Backyard 呢個全新場地模式，務求拉近同大家嘅距離。現場空間特別強調「Homey」同「親密感」，僅僅開放 1,000 個名額，令台上下可以真正做到「零距離」互動。

ToNick 興奮指：「我哋嚟過呢到好多次，但今次想透過 Backyard 模式玩啲唔同嘅嘢，想同一千人一齊用『愛』發電，玩爆個場！」

除了場地革新，今次最爆嘅 point 莫過於「全場拜神儀式」。

平時淨係得 Artist 同 Crew 先可以參與嘅開騷傳統，今次竟然邀請埋觀眾參與，屆時會有充滿儀式感嘅切燒豬環節。最令樂迷驚喜嘅係 VIP 門票福利，除咗有簽名海報同合照，仲會獲贈極具創意嘅小禮包（圍裙及抹手巾），最誇張嘅係竟然包含「拜神燒豬一客」，令唔少網民大嗌：「真係當正大家係自己人，成件事好暖！」

---------

成熟嘅男人開始明白世界運作嘅方式，所以會知道「既來之，則安之」嘅道理。
只有另一伴快樂，家庭先會快樂，世界先會快樂。所以我哋已經做好洗碗抹地，任勞任怨嘅覺悟。
因為愛，我願意做你嘅洗碗機。

今年 5 月 1 號，ToNick 帶住 《Backyard Live: ToNick 我是你的洗碗機》
嚟到 Backyard @ AXA Wonderland，同大家開一個特別近、特別暖、特別有「自己人」感覺嘅 show。呢一晚，獻俾每一個為愛付出、為屋企出力、表面口硬，內心其實好暖嘅你。今次唔止係睇演出咁簡單。
我哋想邀請大家一齊行近啲、再近啲——
喺開 show 前，同 ToNick 一齊參與拜神儀式，仲會有充滿儀式感嘅 切燒豬環節。
平時只屬於 artist 同 crew 嘅開 show tradition，今次想同你哋一齊分享。AXA Wonderland 我哋都嚟過好多次。今次再選址呢到希望可以透過Backyard呢個新嘅場地模式再拉近同大家嘅距離，同一千人一齊用「愛」發電，玩爆個場！

VIP 專享：
・VIP Zone
・VIP 小禮包（圍裙 & 抹手巾）
・1:1 合影
・簽名海報
・拜神燒豬一客

．請勿誤信非官方售票渠道

Follow 埋 Timable 演唱會 FB 專頁：
https://www.facebook.com/timable.hk.concerts