一晚，兩種聲音。
從下午，穿梭到夜晚。

一場專屬於這個夏天的現場，
一段，與你只隔幾步的現場。

組合 PER SE 將與 特邀嘉賓 晚安莉莉 於 6 月 27 日開騷，假座於 Backyard @ AXA WONDERLAND 舉行《Backyard Live: PER SE NIGHTTIME POEMS FEATURING 晚安莉莉》，PER SE 未開騷先興奮準備，仲講明彈足成日，希望 Fans 聽完夠晒 Chill：「今次畀觀眾其中一個驚喜就會係我哋有一首新歌推出！以依家計劃嚟講，應該係先演唱、再派歌，所以到時嚟嘅觀眾應該係『宇宙第一次』聽呢首歌，同埋始終都係兩隊 band 嘅 show 一定會有驚喜。」

PER SE 就非常貼心提醒樂迷飲夠水先入場，做足防曬準備享受初夏音樂盛宴：「做戶外 show 最勁就係有風景睇，同埋音樂聲會自然好多。咁呀我哋彈彈吓見到日落、入黑，再入到 night time！」今次 PER SE 開騷更邀請晚安莉莉做嘉賓，PER SE 就話大家都鍾意日本音樂，台上表演時會更有感覺：「到底我哋會唔會合唱或者 cover，咁真係要嚟睇先知喇。我哋對呢件事都非常之認真，唔會就咁你彈你、我彈我咁樣個狀態啦。同埋今次難得係一個戶外 show 啦，我哋都特別設計咗一個歌單係啱 outdoor 聽。」