【#timable睇電影】《汪汪夢裡人》5大看點

由安樂影片榮譽發行，榮獲奧斯卡最佳動畫長片提名，感動橫掃全球60+項大獎及提名，年度最暖心感人之作！改編自繪本圖文小說，懷舊金曲配樂重現八十年代紐約風情，被譽為大人才真正看得懂的動畫，溫柔地治癒着城市人孤獨又脆弱的內心深處，堪稱動畫版《星聲夢裡人》x《優獸大都會》！

電影將於6月20日正式在香港上映，相信期待已久的觀眾入場時定必會驚喜萬分！

看點1：改編自繪本圖文小說 以簡單直白故事尋找人生療癒嘅方法

電影《汪汪夢裡人》係改編自莎拉華倫嘅同名圖畫書。依本比小朋友睇嘅書教識導演巴伯羅柏格面對失去時嘅複雜感受，為佢帶嚟創作電影《汪汪夢裡人》嘅靈感。導演表示：「除咗書中圖畫吸引到我，最緊要係圖畫書令我開始思考友誼嘅本質。」導演認為故事令佢回想起長大後失去嘅朋友，希望觀眾可以通過《汪汪夢裡人》學識接受失去，同埋喺失去後尋找療癒嘅方法。

看點2：深受吉卜力動畫影響 電影參考了日本動畫的製作方式

喺創作《汪汪夢裡人》嘅時候，導演主要參考咗日本動畫嘅製作方式。因為喺導演成長嘅時期，吉卜力工作室嘅動畫對佢影響好深，例如《龍貓》、《魔女宅急便》同埋《千與千尋》等等。仲有，日本動畫大師高畑勳嘅作品都係啟發佢創作依部動畫嘅原因之一。佢覺得而家大部分嘅動畫電影都係注重動作同喜劇，而日本動畫就好好善用角色嘅情感嚟講故事。佢希望《汪汪夢裡人》可以成為一部非主流嘅，能夠感動人嘅電影。

導演認為《汪汪夢裡人》最大嘅挑戰絕對係要喺冇對白嘅情況下，講一個有感情嘅故事。雖然困難重重，但對製作團隊嚟講都係一種巨大嘅樂趣。佢地可以透過一個冇限制表現手法同講故事形式嘅媒介，將作品帶出電影最純粹嘅本質。《汪汪夢裡人》正正係團隊心目中最純粹嘅電影，相信入場嘅觀眾都會被呢部動畫嘅簡單直白、卻有深意嘅故事所感動。

看點3：以爵士樂營造出80年代紐約街頭氣氛 導演與金曲《September》大有淵源！

電影揀咗八九十年代嘅樂隊Earth, Wind & Fire嘅流行金曲《September》作為主題曲。導演認為依首歌係有史以來最好嘅流行歌曲，即使製作期間聽咗幾千次，都仍然好鍾意！同時，導演亦笑言佢同依首歌有淵源。「我喺九月揀咗依首歌做主題曲，後來我細讀歌詞嗰陣，更留意到一句『Do you remember, the 21st night of September』，而9月21日正係我女兒嘅生日！依套電影就好似我個仔一樣！」

電影透過優美旋律同酷炫爵士樂，成功用配樂營造80年代紐約街頭嘅氛圍。無論係當地嘅噪音、喧囂嘅社區，定係熙熙攘攘嘅街道，都喺音樂嘅陪襯下變得好真實。不過導演都承認，依個設計好具挑戰性。「好多真人電影可以即場錄音，但係動畫電影就需要由零開始構思同創作電影嘅聲音。」《汪汪夢裡人》雖然冇角色之間嘅對白，但故事性強烈，入場嘅觀眾一定要留意戲中環境聲音帶黎嘅吸引力！

看點4：被譽為動畫版《星聲夢裡人》 大受世界各地觀眾愛戴

《汪汪夢裡人》擁有唔少經典電影嘅元素，佢嘅世界觀設定有啲似《優獸大都會》(Zootopia)，喺度有好多唔同種類嘅擬人動物，反映出紐約嘅多樣性。另外，好多國際影評人稱讚電影入面狗狗同機械人之間嘅互動，猶如動畫版《星聲夢裡人》(La La Land) 及《從前的我們》(Past Lives)，好多海外影迷更創作出各式二次創作嘅作品，例如將電影嘅片段同其他電影作對照，證明好多觀眾都好鍾意《汪汪夢裡人》！

另外，《汪汪夢裡人》喺國際影評網站都獲得好高評價！喺爛番茄（Rotten Tomatoes）上，佢嘅新鮮度（Tomatometer）高達97%，而喺Metacritic上嘅Metascore亦有86分，仲獲得咗「Must-See」嘅標籤！各個界別都好讚賞呢部電影，喺全球大受歡迎，香港嘅觀眾絕對唔可以錯過！

看點5：戲中橋段向經典電影致敬 驚喜彩蛋切勿錯過！

《汪汪夢裡人》有好多向經典電影致敬嘅場景，影射唔同紐約風情電影，例如《曼克頓》嘅風格、《綠野仙蹤》嘅經典踢踏舞場面、《閃靈》嘅雙胞胎女鬼、《觸目驚心》嘅浴室橋段。仲有《的士司機》、《星球大戰》、《猛鬼街》、《回到未來》、《午夜牛郎》、《惑星歷險》、《杜絲先生》、《大保齡離奇綁架》同《鐵甲萬能俠》等等經典電影，相信留意嘅觀眾一睇到依啲彩蛋，一定好興奮、好驚喜！