首届「KKBOX香港风云榜」完满结束!小T同大家率先重温现场精彩片段!

每年台湾嘅「KKBOX风云榜」颁奖典礼都系华语乐坛其中一个年度音乐盛事,与其话系颁奖典礼不如话系一个音乐表演!有别于香港固有嘅颁奖礼,「KKBOX香港风云榜」系一个满足视觉、听觉加心灵享受嘅颁奖礼,将台湾嘅颁奖模式带到嚟香港,小T好庆幸自己有机会去到现场体验呀!

视觉上,「KKBOX风云榜」贯彻一向高质嘅舞台规格,为每一位歌手贴心设计左唔同嘅舞台效果,包括系灯光设计、LED大萤幕背景、甚至系观众手中嘅萤光棒,都会跟随歌曲转变节奏或颜色,无论系台上定台下都达到一致、融洽嘅画面。除左欣赏歌手,小T成晚都俾个萤幕画面吸引住,渠地真系设计得好靚!

听觉上,首要嘅一定系歌手本身把靚声啦,第一位打头阵嘅「年度风云歌手」就系皇上张敬轩,带同11位弦乐团成员出场,唔知系咪为嚟紧个中乐演唱会做定预习呢?皇上唱现场比起CD听更有气势,听到出哂耳油!最后仲率先唱出当晚12点先正式曝光嘅新歌《YOU》俾大家听,连同16位dancers大跳热舞,差啲以为自己睇紧渠演唱会T^T


第二组出场嘅系C Allstar,DJ King 好有心咁整左首 EDM版《人人》做开场,真心唔差呀!之后四子就合唱左《音乐殖民地》、《薄情歌》同《再不再见》,小T好滚动,有幸听到休团后嘅C Allstar同台演出!


「表演嘉宾」SHAUN系韩国组合The Koxx嘅EDM DJ,大家可能唔识渠个名,但应该都会听过渠首《Way Back Home》,渠啲音乐系几有感染力㗎!

「年度风云歌手」之一唱作才女AGA江海迦,唱出《3AM》、《小问题》同《一》三首大热歌,亦系小T好钟意嘅歌!顺带一提,AGA只系出道左短短几年已经好有台风!


之后就到小巧-邓小巧以「年度编辑推荐歌手」身分出场,第一首就唱左《芭乐之石头芭乐RockBallad》。小T系第一次听小巧唱现场,唱得够稳定,好好听!

初为人父嘅「年度风云歌手」 Jason 陈柏宇,一出场就坐定定弹结他唱《无限大》,实行要冧爆大家!之后仲唱埋《认真如初》同做饭歌《别来无恙》,真心正呀!


远道而来嘅「风云大使」蔡健雅 Tanya一口气唱出《空白格》同《陌生人》两首名曲。一开口已经好有气场,系实至名归嘅金曲歌后!之后仲带嚟新歌《我要给世界最悠长的湿吻》。


另外香港「风云大使」有谢安琪同Supper Moment,虽然呀Kay耳机全程受干扰,但都好专业地唱哂5首歌,包括同6号合唱《罗生门》后再同Sunny合唱《橙海》、《Shallow》等,都算系顺完成表演呀!


接住继续有嚟自台湾嘅「风云大使」-小队长卢广仲!一如以往都系拎住个结他自弹自唱先,总共唱左三首歌,包括有《我爱你》、《OHYEAH!!!》同都系当晚仲未曝光嘅新歌《爱情怎么了吗》。(其实渠仲唱左几句《几分之几》架,系小编最想听渠唱嘅歌呀T^T)


压轴出场唔洗讲大家都知一定系Joey容祖儿啦!唱左长达11分钟嘅《心之科学》、《花千树》、《破相》、《连续剧》、《天窗》、《这么近那么远》Medley 同仲未派台嘅新歌《PrettyCrazy》,High爆全场!


心灵上,呢个无容置疑系一个具可信度嘅颁奖典礼,根据乐迷点播次数而产生嘅年度得奖名单,单单呢点已经俘虏左唔少香港乐迷嘅心喇!能够见到咁多位亚洲实力歌手齐集香港同台演出,实在唔系一件容易嘅事。

小T十分期待有第二届「KKBOX香港风云榜」,香港人要继续支持香港乐坛呀!

文: vc