同「老」「细」一天游

相信唔少家庭都会为假日活动头痕，特别系小朋友同长者之间挣扎，一嚟小朋友需要地方放电，二嚟又要方便长者活动，所以同大家介绍下既啱小朋友玩又可以同长者一齐去嘅地方，尽情享受家庭乐啦！

彩荣路公园（九龙）
地址：观塘牛头角彩荣路88号
开放时间：全日开放
费用：免费入场

彩荣路公园由矿石场改建而成，所以公园以岩石作为主题，设有岩石展区，小朋友唔洗上山下海都可以触摸各种岩石，家长同长者都可以同小朋友一齐学习。
摸完岩石，小朋友可以去公园嘅游乐设施，有唔同难度嘅攀爬架，有别一般街边游乐场得瀡滑梯咁闷。重点系公园设有完善无障碍设施，有升降机来往上下层，通道设计都平坦宽阔，就算长者行动不便或坐轮椅，都无有怕！同场仲有长者健体园地，长者都可以玩埋一份。家长都可以事先准备定小食，玩到攰可以系休憩凉亭坐底开餐。
*彩禧路公园同彩荣路公园相近，不过相对地彩禧路公园嘅楼梯比较多，行动不便嘅长者未必适合。

交通：
从彩虹站A1出口步行坪石公共运输交汇处一楼平台，搭83A小巴，途经四个站，彩福邨落车，步行约两分钟至彩荣路公园

九龙湾B出口步行约二十五分钟左右至彩荣路公园

南昌公园 （九龙）
地址：九龙深旺道20号
开放时间：全日开放
费用：免费入场

想去野餐唔洗入迪欣湖，南昌公园都得，而且面积大，邻近港铁南昌站，交通方便。大地任你行，唔少草地都有树荫，唔怕得个晒字。园内有唔少座位，老人家唔方便坐地下嘅都可以坐木椅，一齐享受野餐乐！
另外公园有两套嘅游乐设施，一套难度较低，另一套就难度高啲。长者都唔洗得个望字，因为呢度都有长者适用嘅健体设备。
如果春天去嘅仲可以睇埋黄花风铃木，树上开满黄色嘅花，景色一流。不过早前受山竹吹袭唔少大树都受到破坏，所以为黄花而去嘅真系要留意下！

交通：
南昌站站D1出口，横过马路后便达公园入口

屯门公园（新界）
地址：屯门屯门乡事会路
开放时间：
爬虫馆－每日上午9时至下午6时 (包括公众假期)
模型船池－每日上午7时至下午11时(包括公众假期)
儿童游乐场－每日上午7时至下午11时(包括公众假期) 每星期一上午7时至下午1时暂停开放，以便进行场地保养工作。 (如星期一为公众假期，保养工作将顺延至下一个工作天进行)
其他公园设施－全日开放
费用：免费入场

屯门公园系动静皆宜嘅family day好地点。环境优美有花有草有树唔洗讲，公园设有爬虫馆，有平时少见嘅爬虫类，例如豹纹龟、伞蜥等。
睇展馆当然睇唔到一日啦！但无有怕，因为园内仲有其他设施，可以分为「玩」同「赏」，「玩」基本上有儿童游乐场，特别啲有模型船池可以放下船仔，再好动啲可以去球场打下羽毛球。「赏」就有香花园同玫瑰园，大把靚花任睇，同时有自然保育园地，欣赏之余，家长都可以教导小朋友珍惜大自然。
如果玩到肚饿，无自备食物都唔洗周围觅食，因为公园内有快餐亭，可以买小食医下肚，继续玩！

交通：
屯门西铁站B出口，步行约十五分钟左右

屯门西铁站转乘505、507或751轻铁线前往市中心站，上天桥转右行到达

大埔海滨公园（新界）
地址：大埔大发街大埔海滨公园
开放时间：
昆虫屋－上午8时至晚上7时
香港回归纪念塔－上午7时至晚上7时
草地滚球场－星期一 (公众假期除外) 关闭 星期二至五 上午8时至下午1时 下午6时至晚上10时 星期六、日及 公众假期 上午8时至晚上10时
门球场 上午7时至下午6时
公园其他设施－全日开放
费用：免费入场

着名嘅大型公园去到厌，可以试下去大埔嘅海滨公园，有足够嘅草地野餐，又可以同小朋友放下风筝。玩到攰上回归塔吹下风望下海，斜路行上去，老人家唔洗担心爬楼梯，太热就去昆虫馆一边「过冷河」一边同「老」「细」认识昆虫。当然唔少得游乐场比小朋友放下电，长者健体园地都系附近，一于「老」「细」一齐玩。
如果系春天去，公园花卉都会开满花，如紫荆花、鸡蛋花等，唔洗出国都可以置身「花花世界」。
回程可以去一转大埔超级城，行下一田食埋饭先走。

交通：
大埔墟港鐡站行至巴士总站出口，搭接驳巴K17或九巴71S 前往富善邨总站落车，经过富善邨商场，沿住指票牌行5分钟到

大埔墟港鐡站行至巴士总站出口，搭港鐡巴K12到大埔中心一田落车，沿林村河步行约15分钟到

北潭涌伤健乐园（新界）
地址：西贡大网仔路北潭涌
开放时间：上午9时至晚上9时
费用：免费入场

想玩下其他活动，可以试下烧烤。西贡北潭涌伤健乐园设施较为完善，适合不同需要嘅伤残人士，设有畅通易达洗手间，唔洗担心人有三急嘅问题。不过石路始终容易跌亲或阻住轮椅前行，大人可能需要份外留意。
北潭涌伤健乐园最特别系有适合轮椅使用者嘅烧烤炉，即使长者行动不便，都可以远行享受烧烤乐。虽然郊外烧烤需要自备食材同炭火，不过偶然一次郊外活动，必定系难忘有趣嘅回忆。

交通：
由钻石山港铁站搭往西贡巴士总站嘅九巴 92 至北潭涌站落车

搭的士由西贡市到北潭涌 （车资约六十元左右作为参考，需视乎路面情况）

珍宝海鲜舫（香港岛）
地址：香港仔黄竹坑深湾码头径
开放时间：
珍宝王国－星期一至六 上午11时至晚上11时30分
星期日及公众假期 上午9时至晚上11时30分
龙轩－星期一至五 中午12时至下午3时及下午5时30分至晚上11时30分
星期六，星期日及公众假期 上午12时至下午4时30分及下午5时30分至晚上11时30分
费用：免费上船参观

如果假期同老人家、细路落街饮茶饮到闷嘅不妨试下去香港最具特色嘅海上食府－－珍宝海鲜舫叹茶，电影《食神》中周星驰最后争夺宝座嘅情节就系呢度取景！
码头有免费接驳小轮，同老人家、小朋友搭去海鲜舫，沿途欣赏港岛南区海岸景色。海鲜舫嘅建筑都极为吸睛，可以一家人饮完茶再慢慢参观。
*珍宝海鲜舫于2019年4月22日至5月7日暂停营业，前往船坞进行例行检查及维修，最新情况记得留意公司网页同facebook，费时白行一转啊！

交通：
港铁香港站D出口步行至中环交易广场巴士总站，搭乘城巴75到深湾码头，搭免费接驳船即可到达

或搭乘城巴70到香港仔码头，搭免费接驳船即可到达

太平山顶（香港岛）
地址：香港岛太平山顶
开放时间：
山顶凌霄阁－早上10时至晚上11时 (星期一至星期五) 早上8时至晚上11时 (星期六、日及公众假期)
费用：免费入场
香港杜莎夫人蜡像馆－早上10时至晚上10时 (星期一至日及公众假期)
费用：有各类嘅门票和套票，去前可以先上网格价及购买门票，会着数啲
搞错3D艺趣坊－早上10时至晚上11时 (星期一至日及公众假期)
费用：免费入场

行厌大商场嘅试下向高发展，去太平山顶一日游，虽然系个讲到烂嘅景点，不过又真系好多人未去过。
凌霄阁有「搞错3D艺趣坊」同杜莎夫人蜡像馆，搭山顶缆车上山，再舒舒服服睇展览，同各「明星」嘅蜡像自拍下。加上最近杜莎夫人蜡像馆做紧优惠，由即日至2019年5月5日，香港居民凭香港永久居民身份证于蜡像馆正门售票处购买两张即日成人门票，即可免费获赠即日成人、小童或长者门票一张。
到夜晚又可以睇到维港靚景，一日family day就咁过。

交通：
从中环8码头搭乘15C号巴士，或港铁中环站 J2出口步行至花园道山顶缆车站，再搭乘山顶缆车登山。

港铁香港站D出口的中环交易广场巴士总站，搭乘新巴15到达

撰文：SN
图片来源：网络