精选「狗」大放电好地点

近年宠物公园愈起愈多，但唔少宠物公园设施简陋，配套不足。一个唔小心中伏去咗，狗仔玩得唔够尽兴之余，更可能分分钟失望而归，所以为大家介绍九个设施较为整全嘅宠物公园，一于搵日同汪星人开心放电。

彭福公园（新界）
地址：新界沙田区沙田马场跑道内围中央
面积：80,936 平方米
配套设施：大草坪(宠物活动区) 、游乐场、洗手间
开放时间：
非赛马日：夏季(五月至九月) 上午9时至晚上7时30分 / 冬季(十月至四月) 上午9时至晚上6时30分
*试闸日则于上午9时30分开放 (一般为星期二及五)
沙田日马赛事（一般为星期六或日)：上午9时 - 上午11时30分
沙田夜马赛事（一般为星期三)：上午9时 - 下午5时

彭福公园最出名就系草地任你行，狗仔一定可以尽情放电，加上同马路、大街有所距离，狗主大可放心任狗仔奔跑。附近就有免费大型停车场，唔洗周围搵地方泊车。可惜公园无宠物相关嘅设施，例如宠物冲洗间之类，狗主可能要多个准备。
*去前记得上网睇多次开放时间，因为偶尔会有特别安排，令开放时间有所更改，甚至暂停开放*

环保大道宠物公园（新界）
地址：将军澳环保大道
面积：4,000 平方米
配套设施：冲洗间、狗厕所、停车场、洗手间
开放时间：上午7时至晚上9时

环保大道宠物公园虽然草地唔大，但胜在设施够齐全，有冲洗间比狗仔洗脚仔，同埋狗狗厕所，最细心系分咗大狗细狗区域，狗主可以更放心。公园设有停车场，但车位唔算多，得35个私家车位，假日有机会无位，最好搵定后备泊车嘅地方。
*呢头蚊虫颇多，去前记得带定蚊怕水*

海皇路花园（新界）
地址：屯门海皇路 (屯门游泳池侧)
面积：2,400 平方米
配套设施：宠物游乐设施、狗粪收集箱、宠物厕所和草坪(宠物活动区)、荫棚连坐椅、避雨亭
开放时间：全日开放

蓝地宠物公园（新界）
地址：青山公路与黄岗围路交界 (港深西部公路桥底)
面积：2,772 平方米
配套设施：宠物游乐设施、狗粪收集箱、宠物厕所和沙池(宠物活动区)
开放时间：全日开放

呢两个狗公园系屯门，设施差唔多，有地方遮荫挡雨。最大差别系海皇路花园有个大草地，加埋多种游乐设施够玩足一日，狗仔实无闷；而蓝地宠物公园最特别系设有沙池，狗主唔洗带狗仔远征到沙滩，狗仔都可以试下系沙地玩。

山顶花园（港岛区）
地址：柯士甸山道40号对面
面积：97,000 平方米
配套设施：洗手间(设有畅通易达洗手间)、狗厕所
开放时间：全日开放

有「秘密花园」之称嘅山顶花园点少得一片大草地，加上附近有唔少英式建筑，可以帮狗仔疯狂影靚相。唯一留意嘅系要行20分钟左右嘅斜路，记得因应返狗仔体力再计划！
*另一个公园柯士甸山游乐场系唔接受宠物进入*

中西区海滨长廊 – 中环段（港岛区）
地址：金钟龙和道
面积：4,700 平方米
设施：宠物公园及宠物通道
配套设施：草坪、凉亭、洗手间 (设有畅通易达洗手间)、狗粪收集箱及洗手设备
开放时间：全日开放

想同狗狗共享美景嘅可以试下去中西区海滨长廊宠物公园(中环段)，望到维港嘅海景建筑，附近都有小食亭，同狗仔玩完，都可以买小食医下肚。不过相对其他公园，呢度嘅狗狗设施比较少，得水喉同狗粪收集箱，最麻烦系得一条路线行入狗公园范围，怕麻烦嘅去前要諗清楚。
*宠物公园范围要经龙和道嘅指定路线进入*

鰂鱼涌海滨花园（港岛区）
地址：鰂鱼涌海裕街
面积：3,000 平方米
设施：宠物公园
配套设施：凉亭、座椅及狗粪收集箱
开放时间：全日开放

怕海滨长廊中环段狗公园麻烦嘅不妨考虑埋鰂鱼涌海滨花园，同样有无敌大海景，带埋屋企人一边吹住海风一边同狗仔玩，夫复何求！虽然无大草地比狗仔奔跑，但都有约半公里嘅长廊，唔怕无地方比狗仔放电。旁边有约50个车位嘅停车场，尚算方便。
*靚景自然受欢迎，比起其他狗公园，呢个位置颇多跑步人士，狗主要留意返*

蝴蝶谷道宠物公园（九龙）
地址：深水埗蝴蝶谷道2号
面积：7,000 平方米
配套设施：宠物活动区、宠物游戏设施、狗粪收集箱和临时洗手间
开放时间：上午7时至凌晨12时
蝴蝶谷道宠物公园系九龙区最大嘅狗公园，园内有好多游乐设施，例如模拟排水管，等狗仔挑战。狗主都可以放心比狗仔跑，因为出入口有双闸设计，狗仔唔容易冲出公园范围。附近都有咪表位同停车场，泊车都算方便。

油尖旺宠物公园（九龙）
地址：九龙渡船街 / 欣翔道交界
面积：2,600 平方米
配套设施：公园内设有流动洗手间、流动残疾人士洗手间、狗厕所、避雨亭和公园长椅
开放时间：上午7时至凌晨12时
另一个位于九龙嘅油尖旺宠物公园都系坐落于闹市，主要有三块草地比狗仔跑，加上公园都设有围栏，唔洗惊狗仔走咗去闹市。相对蝴蝶谷道宠物公园，呢边就无狗狗游乐设施，不过都邻近公众停车场，狗主可以再衡量边个啱心水啲。

撰文：SN
图片来源：网络