寻找隐身闹市嘅绿洲——独立书店

作者: Timable, 5月27日 (一) 下午5时20分


香港寸金尺土,大型书店主要卖流行热门嘅书籍,更甚卖埋文具同饮品,真正卖书嘅地方少之又少。不过沙漠中依然不缺一抹绿洲,香港依然有独立书店专卖社会学术嘅书籍。「书搵人, 人搵书」,小T系度介绍香港数处绿洲,绝对值得一去寻爱书,以及支持一下独立书店。

序言书室
地址:九龙旺角西洋菜南街68号7字楼
开放时间:下午1 时 ‑ 下午11时

序言书室藏身系全香港最热闹嘅地区——旺角,主要售卖及代订人文学科及社会科学之中英文学术书籍,包括︰文学、哲学、政治、社会学、历史、文化研究等。一众哲学家嘅书都系放当眼位置,就算平时销量唔好被连锁书店忽略嘅书籍,呢度都会有。
另外,序言都会举办各项文化活动,如读书会、座谈会、新书发布会等,借此推动阅读风气。有兴趣嘅记得留意渠地嘅活动公布啦!



KUBRICK
地址:九龙油麻地众坊街3号骏发花园H2地舖
开放时间:上午11 时半 ‑ 下午10时

KUBRICK名字借用电影大师Stanley Kubrick,渠地系多元化嘅文化聚散地,有各种出版图书、表演艺术、阅读分享会、合作学堂、艺术展览等项目。铺头一边作为书店贩卖杂志书籍,由文学、文化研究、社会科学、音乐摄影电影等艺术类书籍,到流行嘅时装及文化杂志都有。而另一边就系咖啡店,买完书可以系度坐下,一边叹咖啡,一边享受书本。
特别之处系附近有电影周边卖,包括各种电影海报及黑胶唱片,KUBRICK都不时会开办文化活动。



小息书店
地址:长沙湾道137-143长利商业大厦11/F
开放时间:星期一至五下午3 时 ‑ 下午7时;星期六、日休息

「我们卖书,我们不卖书」,小息书店理念系入嚟唔一定要买书,亦可以系休息嘅地方,好似学校小息时间咁。渠地希望以书作为媒介,推广阅读风气,借此培养一种文化。虽然书店由宗教团体开办,但渠地唔止卖宗教书籍,最流行嘅书籍都未必系度搵到,比起销量,书店更重视质量,更甚渠地都会留出位置,放置自资出版嘅书籍,支持及帮助有梦想嘅作家。
此外,铺面都会卖手作同公平贸易产品,可以话店里每一处都有心思放置。同其他独立书店唔同嘅系渠地更重视空间感,空间宽敞,玻璃窗边摆设藤椅及枱,睇书睇到攰就望下窗外景色放松下。小息书店都会举办讲座同读书会。



艺鹄
地址:香港湾仔轩尼诗道365-367号富德楼14楼
开放时间:星期二至日中午 ‑ 下午7时;星期一休息

艺鹄系由资深艺术工作者冯美华筹办,由英文ACO(Art and Culture Outreach)音译过来。艺鹄视己为基地伸延至整个城市,策划及展示艺术,特别系另类、实验和非传统嘅艺术类型,定期举办唔同嘅文化活动如展览、音乐会、电影放映会、读书会、讲座、记者会等供人欣赏。继而,当代文化现象和议题得以探研、讨论,什或出版。
除咗文化活动,艺鹄都系一间独立书店,存书来源主要系嚟自结业嘅曙光书店,加埋店主精心挑选非主流、人文理论与文化研究为主嘅书。当中仲会有簇新嘅二手书籍,以及过期杂志,部分都系以优惠价出售。此外,渠地都会寄卖独立艺术嘅作品。



乐文书店
地址:九龙旺角西洋菜街62号3楼
开放时间:上午11 时 ‑ 下午9时半
分店:铜锣湾骆克道506号2楼
开放时间:星期日至四上午11 时 ‑ 下午10时;星期五、六及公众假期前夕上午11 时 ‑ 下午11时

乐文书店系1984年成立,系最早引入台版书嘅香港书店。同其他独立书店一样,乐文书店都系有着浓厚人文气息,小众嘅书,例如文史哲、社会科学、教育、 心理辅导等都有机会系度搵到。另外,书店都有经常做优惠打折,书籍价钱都比较便宜,买多啲书都唔会太肉痛。
就算两间分店系旺区位置,但店内环境安静,一嚟系位于楼上,二嚟搵到呢处「绿洲」都系爱书之人,唔会高谈阔论,而系真心去搵书享受书本。



我的书房
地址:太子荔枝角道79号宝丰大楼
开放时间:下午1 时 ‑ 下午9时半

我的书房系一间二手书店,店主Daniel系80后嘅青年,用尽所有积蓄同心血开店。书店目标系好书继续流转,让更多人得到阅读嘅乐趣。比起其他书店,我的书房嘅书籍种类较多,除咗人文学科嘅书籍,都有卖工具书、百科全书、经济学、股市投资及小量儿童书籍。
用一个字形容呢间书店就系「乱」,书籍排山落海嘅摆放,连地下都摆放一堆又一堆嘅二手书,不过店主Daniel认为「乱」就系我的书房嘅特色,而且「乱中有序」,隐藏着高度理性化嘅秩序,而秩序只有店主Daniel知道。二手书嘅特别之处莫过于发挥书本嘅目的——被阅读,令「书搵人, 人搵书」不断地循环,唔会净系停留于一个读者中。


*独立书店嘅开放时间容易因应文化活动有所变动,所以去前最好上官网睇多次稳阵啲*

撰文:SN
图片来源:网络