在家抗疫嘅日子停不了,最近恢复返home office,多咗时间喺屋企,紧系进行大清洁啦。根据外国文章"How to burn 600 calories cleaning your house: Research reveals the most demanding chores (and why two hours of cleaning is better than a 5km run)”,研究透过安装追踪器喺测试者身上,测出边种家务最可以消耗最多嘅卡路里。研究结果显示,原来集中做两个钟家务,平均可以消耗到600卡路里,比起跑5公里所消耗嘅374卡路里仲要多。

当然做家务系不可能代替运动训练,不过抗疫时期,郁吓好过唔郁啦!

行楼梯掉垃圾 30分钟消耗249卡路里
好多人掉垃圾可能只系掉出同层嘅后楼梯,但如果每晚行远啲扔,上落多几层,就可以利用行楼梯呢个过程嚟消耗卡路里。或者可以拎垃圾到屋企附近嘅垃圾分类筒,进行分类回收。行楼梯时,可以两级上,消耗卡路里效果更显着。

清洁窗户 30分钟消耗172卡路里
清洁窗户系收紧bye bye肉嘅一项家务,因为清洁过程需要凌空手臂,更要做出重复嘅清洁动作,会用到背部同腹部嘅肌肉。如果唔想只系郁到一边手臂,清洁窗户时可以运用双手,或交换运用,咁就唔会一边手酸软啦!

扫地及拖地 30分钟消耗145卡路里
扫地同拖地基本上系抗疫期每日必做。用扫把扫地再加拖地,两项加埋都要用上半个钟,比起单用吸尘机,流汗效果更明显,可以燃烧到145卡路里,等同跟咗15分钟跑步机㗎啦。所以大家唔好懒,今日开始就改用扫把同地拖啦!

洗碗 30分钟消耗69卡路里
香港地家庭人数唔多,普通家常便饭通常要洗嘅碗都唔会太多。但其实洗碗唔止系手部运动,仲可以训练臀部同大腿,洗碗时可以同步做后抬腿练习,有助臀部变得更紧实。首先,一只脚向后抬起,膝盖要保持微微弯曲,保持一阵呢个动作,脚就可以放返原本位置,交替重复咁做,就唔会浪费咗洗碗时间。

清洗浴缸 15分钟消耗100卡路里
呢项都算系小编觉得最辛苦嘅家务,一来浴缸有深度,需要弯身进行清洁;二来清洁浴缸上嘅污渍的确要用好大力气。但只要你努力出尽力洗刷15分钟,就可以燃烧到100卡路里,同做咗30个「深蹲跳」差不多。而且过程中会用到肩膀同手臂嘅肌肉,要小心唔好拉伤呀。