【彩色运动场】香港多个天台运动场 新潮打卡运动热点

多做运动身体好，有个靚场就更加好! 疫情反覆，有时留喺屋企太耐都会想郁吓，出去伸展吓筋骨。香港近年多咗好多新兴运动场，有由旧街场经过活化翻新而成嘅多用途运动场，亦有商场新增嘅户外草地运动场。除咗运动设施之外，更加运用创意思维，将街场都设计得好有格调，有个靚场，做运动都精神啲啦!

翻新咗嘅运动场，街坊有个好地方聚脚做运动之外，都吸引咗唔少人嚟影相打卡。提提你，打卡还打卡，喺共享地方要尊重自己尊重别人，千祈唔好阻到其他人做运动呀!! 以下就介绍几个都系位于天台嘅靚场比大家，咁啱住附近嘅你就记得去郁多啲啦! 就算唔喺街坊，香港嘅社区咁靚，经过都欢迎你去踩吓场!

---

将军澳「明德主场」
明德商场上盖球场 全港首个女性友善运动场


位于将军澳嘅明德商场，民坊完成活化工程后喺2021年1月重新开放，加入咗1.5万呎全新运动共享空间。球场设于商场停车场上盖，以鲜艳渐变颜色设计，从唔同嘅角度睇，会见到”W”或”M”字，同时代表Women(女性)及Men(男性)，推行男女共融; 同时，都可以象征Willpower(意志力)、Worthiness(价值)、Motivation(动力)等等。球场围栏上面仲刻有好多具激励性嘅字句，例如「练波辛苦 输仲辛苦」、「完场前 永不放弃」、「完场后 不忘初心」等等，引起共鸣之余，打波途中望到都有啲鼓励㗎!


作为全港首个女性友善嘅运动场地，场地亦同非牟利机构Women in Sports Empowered HK (WISE HK)合作，计划持续举办女性恒常训练班，鼓励女性持续运动。球场外都有唔少贴心设施，包括钢面镜比运动员喺运动前后方便整理仪容，仲增设挂袋勾方便挂随身物品。场外一样用咗鲜艳色彩设计嘅「Rest松」(Rest Zone)，有摆放辅助肌肉伸展嘅装置，方便进行热身拉筋及伸展放松运动。

地址: 将军澳培成里10号
开放时间: 6am - 10pm

---

九龙湾「启业运动塲」
型格设计加入香港元素 特色挑战区活现街头文化


位于启业商场天台嘅启业运动场，喺篮球街场界别一向都好受欢迎，重点喺有上盖，就算落雨都依然可以打波。由黄色铁栏包围住嘅篮球场，又被称为「黄金空中笼」，球场喺翻新后都依然保留呢个深入民心嘅特色。翻身后，场地加入特色元素，重新上漆嘅铁笼换上更光鲜嘅黄色，场地同柱身漆上深灰色及黄色，换上透明篮板加萤光色外框，非常型格。设计者亦别有用心，加入许多香港元素，强调「敬业乐业 Never Quit」嘅香港精神，颜色使用方面，加入咗萤光效果嚟代表香港嘅本土霓虹灯，配合埋场地嘅深灰色主色，显得格外抢眼。球场上唔同地方都喷上咗一啲打气金句，你又搵唔搵到属于你嘅句子呢?


设计以外，球场都变得多元化，加入唔少设施，例如「启业穿三针」射篮挑战区，墙上有唔同高度篮球架，地下亦画咗唔同大小嘅圆圈，想点挑战任你话事! 所谓街头文化，就系要自由嘛!

篮球场以外仲有唔同运动区域，包括羽毛场以及三人足球场，围住室内球场亦有一条缓跑径，钟意各种运动嘅朋友都可以有各种选择。而室外位置亦有色彩缤纷嘅儿童天地，设有跳飞机格仔，啱哂小朋友一齐放电!

地址: 九龙湾启业道18号启业商场停车场天台
开放时间: 7am - 10pm

---

屯门「兆禧运动场」
多个特色运动球场 x 平衡车赛道 幽默打卡热点


位于屯门兆禧苑停车场上盖嘅运动场，活化之后成为咗区内独一无二嘅多用途运动场。运动场主色为亮丽蓝色，配合橙色同白色线条，形成强烈对比，鲜艳嘅颜色为社区带嚟唔少生气。运动场设施丰富，主要有一个全场篮球场、一个多用途球场、两个单边篮球场、两条长150米嘅缓步径、仲有特色「游戏地景」以及「车胎地带」。场地更加有特色赛道，可以用嚟作平衡车训练同比赛，香港玩平衡车嘅地点唔多，呢度都喺一个唔错嘅选择。


除咗运动，兆禧运动场打卡都一流㗎! 场地以「笑，嘻」为主题，设计咗多个打卡位，通往球场嘅楼梯、「笑左笑右」打卡墙，都充满幽默感。喺球场入面细心睇，仲会发现隐藏住好多笑脸，你又搵得哂吗?

球场部分时间提供网上预约，有兴趣嘅朋友记得先上民坊官网，预约你想使用嘅场地喇!

地址: 屯门湖翠路201号
开放时间: 6am - 10pm

---

屯门「爱定篮球场」
彩色屋村篮球场 大胆配色打卡-able


屯门仲有另一个色彩缤纷嘅上盖篮球场，位于屯门友爱和安定邨的爱定商场。喺由民坊、Red Bull以及艺术企业SWL合作，将爱定篮球场重新设计，将原身普通嘅屋村篮球场摇身一变成为艺术感十足嘅运动场地，仲好啱打卡添。艺术团队将篮球场重新涂上鲜艳色彩，用色都非常大胆，睇落相当有活力!


地址: 屯门乡事会路2A号爱定商场上盖
开放时间: 9am - 9pm

---

沙田新城市「跃动悠园Sportzone」
全港首个空中草地运动公园 7大户外健身设施


喺沙田新城市广场平台有个新嘅运动公园免费比市民享用特色健身设施，场地占地3.5万平方呎，有7大户外Fitzone: 当中包括好玩又刺激嘅5米高滑草梯、17米长S型悬吊式平衡木走道、15米长攀石墙、划分成8种唔同训练嘅无器械健身区、特色篮球场、草地缓跑径仲有森系小山坡及秘道打卡区。场地色彩运用丰富，设施都颇多元化，虽然唔算喺正规嘅运动场，都适合一般家庭嚟做吓简单运动轻松下㗎! 场地定期都会举办运动课程，部分设施例如滑草梯喺需要喺商场消费先可以参加，更多详情请留意商场公布!

地址: 新城市广场1期5楼平台
开放时间: 7am - 10pm

---

图片来源: 网上
撰文: HL