YouTube 影片


日清食品「合味道纪念馆香港」已经正式开幕喇!!唔少香港人去日本旅行都有去过呢个纪念馆,依家喺香港都可以玩到喇! 合味道纪念馆选址尖沙咀中港城,总共有三大好玩工作坊,除咗有大家熟悉嘅两个热门工作坊: 「我的合味道工作坊」以及「出前一丁工作坊」之外,纪念馆仲带嚟咗全球独家限定「榖物麦片工作坊」,制作属于你独一无二嘅日清人气产品! 除咗工作坊,仲有三大打卡位,日清粉丝们千祈唔好错过喇!

三大人气工作坊:
我的合味道工作坊


发挥你嘅小宇宙,设计出你独有嘅合味道杯面! 参加者可以喺杯面包装上面画上你钟意嘅图案,然后自己选配料,再拎去做密封包装,就完成你嘅尊属口味杯面喇!


我的合味道工作坊
票价: $60 | 工作坊时间: 30分钟
3岁以下并不占座位幼童,可在成年人陪同下免费入场。


出前一丁工作坊


平时3分钟可以煮好嘅一碗出前一丁公仔面,到底亲手由面团开始制作又需要几耐呢? 喺出前一丁工作坊,听完讲解员介绍出前一丁由来,你就可以一尝制面过程,参加者可以亲自体验搓面团、切面过程,利用「瞬间热油干燥法」炸干面团,最后当然唔少得嘅就喺设计包装啦!


制作过程中,参加者仲要戴上出前一丁头巾同埋围裙,造型满分! 而头巾最后仲可以变成便当巾,包住你嘅出前一丁制成品成为一个便当带走添!

出前一丁工作坊
票价: $120 | 工作坊时间: 90分钟
参加者的最低身高要求为110厘米。活动须分组进行,参加「出前一丁工作坊」的访客必须购买双数数量的门票。
*此工作坊将于4月中正式开放。最新详情会定期于官方网站公布。


谷物麦片工作坊


全球独家限定嘅谷物麦片工作坊,率先嚟到香港! 参加者一开始透过互动投影装置嘅小游戏,可以了解到呢个新产品诞生的缘由及制作过程,画面得意可爱,啱哂一家大小一齐玩! 玩完之后就可以制作你嘅谷物麦片,设计好包装之后,就可以选择你喜爱嘅食材配料,有好多种水果干等等,睇落好好食啊!!


谷物麦片工作坊
票价:$60 | 工作坊时间: 30分钟
参加者须年满3岁。

玩完哂工作坊之后,当然唔可以错过馆内多个打卡位啦!!


三大打卡位:
3米高「大杯面」


必影打卡位!!好大个杯面超可爱!!但喺点解倒转咗? 原来喺用嚟致敬安藤百福先生嘅「逆向思维」概念,多得呢个想法突破既有思考框架,杯面才得以大量生产㗎!

日清漫画墙


入场之后,会见到一幅有关安藤百福创造力之旅嘅历史时间线墙,由即食面、杯面嘅生产契机,到现时嘅太空杯面都有介绍,背后有好多得意趣闻!! 而喺时间线后面,就有一幅日清漫画墙,用漫画风格介绍馆内三个工作坊,啱哂打卡到此一游!!

杯面墙


入场位置仲有另一个打卡位,就喺呢个震撼杯面墙喇!!墙上面除咗有大型杯面嘅切面之外,仲有嚟自世界各地嘅热门口味杯面! 快啲搵吓有冇你嘅最爱喺里面?

仲未够喉? 临走前去埋合味道纪念馆纪念品店,选购埋纪念品,就完满结束今次旅程喇! 纪念品店入面除咗有各种特色产品,仲有香港独家杯面组合连纪念品,而且更会展示出唔少经典纪念品,有金杯面、怀旧装置等等。精品店位置喺免费入场㗎,大家都可以去睇吓有冇心水产品啦!!


合味道纪念馆香港
地址: 尖沙咀中港城2楼26-35号
开放时间:
逢星期一、二、四、日 11:15am - 8:15pm
逢星期五、六及公众假期 11:15am - 9:15pm
逢星期三 休馆

票务详情:
访客请提前于网上预约参加工作坊: http://www.cupnoodles-museum.com.hk
*纪念品店免费入场。


撰文: HL