西贡作为香港后花园,以绝美景色见称,而有靚景嘅行山路线选择都相对颇多㗎!! 今次介绍嘅地点就喺西贡万宜水库东坝,属于一条比较轻松易行路线,一般行山人士或者亲子假日郊游都好适合,欣赏埋世界级地质奇景仲有多个打卡热点,景色相当壮观宏伟!

万宜地质步道喺西贡地区都喺最受欢迎景点之一,位于西贡万宜水库东坝,全长大约1.4公里,来回行整条步道需要约1.5 - 2小时。以郊游路线嚟讲交通都算便利,可以选择由北潭涌开始步行前往,亦可以乘搭专线小巴或的士直接到达万宜水库东坝,而驾车人士就要注意,如果想驾车前往就要事先申请先可以。

注意: 沿途并无补给站,部分路途亦较开扬,记得准备要充足水分及粮食,仲要定时补搽防晒以免晒伤! 仲有留意自己能力,更要有同行人士一齐前往,就更加安全啦!! 大家亦要好好爱护环境,带走垃圾,疫情下更要做好防护措施,保护自己保障大家!


由北潭涌开始步行至万宜水库东坝,全程大约9公里,步行大约3小时,路途虽然长但道路平坦,基本上都喺石屎路,风景开扬,沿路不时都会有海景同树荫,相当舒服。不时会有牛经过,千祈唔好随意喂食或者骚扰渠地休息,不过就小心地面有唔少「牛屎地雷」喇!


见到大大个蓝色万宜水库纪念碑,就喺东坝入口喇!! 坝顶景色十分广阔,有无敌大海景环绕,冇遮挡嘅环境下仲有种被天空包围住嘅感觉,远望亦可以观赏破边洲景色。


如果想挑战花山近距离睇破边洲,详情可以睇睇呢条路线 -> https://timable.com/blog/1900022



由坝顶慢慢向前行及至坝底,沿途景观极为壮观,可以欣赏各种因为亿万年前火山喷发而成嘅世界级地质奇观,有世界级六角形岩柱,S型岩柱相当特别。



身处各种巨型岩石下顿时觉得自己显得非常渺小,整个景观的确极为震撼。请留意,岩石边虽然只有矮石壆,但都千万唔好爬入去,一来有机会会有碎石滚下形成危险,二来更要好好保护环境。


坝底尽头就喺海蚀洞,喺多年来由大浪冲击侵蚀而成嘅,近年兴建咗木步道,可以近距离观看海蚀洞,听住水滴声非常疗愈。


围着水坝边嘅巨型防波堤,都喺东坝特色之一,吸引唔少人前往打卡,不过防波堤唔喺固定装置,有松脱机会,所以唔建议大家爬上去影相喇!


前往路线
路线1: 北潭涌步行前往东坝
乘搭由西贡市中心开出的嘅94号巴士 / 由钻石山港铁站嘅96R巴士(只在周末及公共假期行驶),喺北潭涌站落车的话,会有士多及公厕; 如果无须补给,可以喺下一站,即喺上窰站落车,会比较近,之后沿大网仔路前行至分岔路口,靠右沿西贡万宜路继续步行就可。

路线2: 乘搭专线小巴或的士直达东坝
假日前往的话,喺北潭涌可乘搭假日行驶新界专线小巴9A号线往返北潭涌与万宜水库东坝之间。回程乘搭呢架小巴返回北潭涌亦相当方便,但要留意服务时间,只有3pm - 6pm行驶 (逢星期日及公众假期服务),班次大约20 - 25分钟一班。

选择的士嘅话,可以由西贡市中心或北潭涌乘搭的士直达东坝,如果回程都想乘搭的士嘅话记得同司机事先约定回程时间喇!

路线3: 参加导赏团
想参加由火山探知馆举办嘅导赏团,可以留意官网详情及报名细节。东坝半日游收费导赏团逢星期六、日及公众假期举办,由位于西贡海滨公园嘅火山探知馆乘专车出发,由导赏员喺车上讲解,到达后可以自行参观东坝,并有专车回程。疫情期间导赏团暂停举办,想知道最新消息,就要留意官网喇: https://www.volcanodiscoverycentre.hk/index.php?lang=zh


全长: 由北潭涌步行前往万宜水库东坝约9公里; 万宜地质步道全长约1.4公里
难度: ★★✩✩✩
需要时间: 由北潭涌开始步行至东坝约3小时; 万宜地质步道来回2小时


撰文: HL