相信好多人都患上咗旅行渴望症,暂时未去得住,就喺香港搵吓特色景点幻想吓先啦! 细心发掘,其实香港好多地方都好靚,尤其钟意去日本嘅大家,依家一于近近地,喺香港市区先来一趟伪日本快闪旅行!! 今次,先带大家睇吓两个充满日式庭院味道嘅打卡好地方啦!

注意,打卡唔好太忘形,保持地方安静,好好爱护环境,自己垃圾自己带走,注意个人衞生,戴好口罩!!


南莲园池

位于钻石山,有一个环境清幽、古色古香嘅园林——南莲园池,就好似一片净土座落于市区闹市入面。整个南莲园池占地3.5公顷,属于志莲净苑南院部分,公园使用咗唐代设计配合特色木结构,园内放置咗大量古树以及奇石,具有中国唐朝古风之余仲有淡淡日式庭院风味。

水车磨坊旁边设有石凳可供休息,静赏美景。
图片: Instagram @sophia_enjoythelittlethings

呈八角形嘅「圆满阁」喺南莲园池嘅主题景点,金光闪闪犹如日本京都嘅金阁寺。
图片: Instagram @sophia_enjoythelittlethings

慢步园内,除咗欣赏优美园景,不时仲会听到园内播放住舒适嘅背景音乐及鸟声,顿时有种洗涤心灵嘅感觉。如此清静嘅地方,建议大家打卡之余,更可以放慢脚步细心欣赏环境。园内更设有茶馆、纪念品小卖店及素菜馆,唔少游人都会选择游园后享用一餐素菜先离开㗎。

图片: Instagram @pcyf

图片: Instagram @pcyf

志莲净苑属于佛门清静庄严之地,请尊重场合,切勿喧哗,亦建议穿着庄重。园内摆设咗唔少盆景,公园内周围都有唔少奇石,大家谨记切勿触碰以及攀爬,注意安全之外都要爱护公园内设施,让每一个游人都有权利欣赏到最美嘅景色。


松茶榭喺园内嘅茶馆,整个建筑周围山石林立,位于苍塘北岸,景色优美,有种空中楼阁嘅感觉。

位于水车磨坊旁边有个小型瀑布, 气势磅礡,流水声非常疗愈。

地点: 九龙黄大仙钻石山凤德道60号
前往方法: 港铁钻石山站C2出口
开放时间: 7am - 9pm


天后庙道3号休憩公园


喺天后庙道有一个隐秘景点,由炮台山配水库向上行,大约十五分钟路程,会到达一个小公园,里面就藏有一个迷你嘅日式庭院。虽然地方比较细,但都总算喺有齐日式庭院主要布置,例如有和式屏风及竹制屋顶、竹筒流水装置(留意是没有流水的呢)、日式石灯笼、小桥等等,都算喺麻雀虽小,五脏俱全。


不过地方真喺比较细,附近都喺学校同住宅,唔喺特别嘅郊游景点,如果去开附近想去影下相,扮吓去咗日本,都尚算可以呢! 呢度平时都有唔少街坊散步嘅时候经过影下相㗎!

地点: 天后庙道70号
前往方法: 炮台山地铁站A出口旁边乘升降机/行楼梯沿炮台山道往上行,到达天后庙道交界过对面马路即到达。


撰文: HL