你仲记唔记得对上一次红到「老是常出现」,而且不论社交媒体上,定系亲朋好友、公司同事,抑或系街上陌生人都会热烈讨论嘅香港艺人系边个?如果你本身有追开偶像或明星,又数唔数到自己有几耐冇全情投入去追?

呢两年,香港一直弥漫住压抑同沉重嘅气氛。而旧年开始,更因为疫情,睇上去无论边个行业都好似死气沉沉,了无生气。但系踏入 2021 年,香港似乎因为一班「仔仔」嘅慢慢崛起,再度变得有活力同希望,讲紧嘅就系近来人气非常强劲,由 ViuTV《全民造星》节目出嚟嘅 12 人男子组合 MIRROR,同埋由同一个节目出嚟嘅 4 人男子组合 ERROR。

2021 年 1 月 1 号嘅音乐颁奖礼,将成员姜涛同 MIRROR 呢个组合真真正正放大喺大众面前。本身冇留意渠哋嘅人,嗰几日都会喺媒体报导上不断见到渠哋嘅名;之后 MIRROR 一首〈WARRIOR〉,听到大家都热血沸腾;再嚟就系 ERROR 同 ViuTV「无制限OT编集団」嘅《ERROR 自肥企画》,当然唔少得 ERROR 成员193 嘅一次受访,就令渠哋社交媒体嘅 followers 急升;跟住就系 MIRROR 嘅「梅窝粉丝事件」,然后就有揿烂 Keyboard 都抢唔到,但系炒飞就越炒越贵嘅一票难求 MIRROR 演唱会;讲讲下就去到近期《大叔的爱》嘅播出,令大家疯狂投入套剧同喜爱出演嘅成员,同埋「我老婆嫁左比 Mirror 导致婚姻破裂关注组」嘅一夜爆红,都令渠哋嘅讨论度不断上升。

数数下,2021 年可以引起大众关注同讨论嘅娱乐性话题,大多数都同呢两队组合有关。而以下呢单,就算点唔留意都好,都一定会系近年「震动」全城事件之一。


过去嘅 7 月 23 号,ViuTV 喺屯门市广场搞咗一个介绍新节目(兼奥运)嘅记者会。如果只系一个普通嘅节目记者会,应该系唔会咁多人关注同讨论,之但系上星期一开始就有媒体报导话 MIRROR 同 ERROR 会一齐现身呢个活动,于是各界都諗个商场真系容纳得晒咁多人?屯门会唔会「陆沉」㗎?等诸如此类嘅问题。到记者会前一日,确认咗时间和人物地点,大家(特别系各路粉丝)嘅关注点,就变咗要几点去到「霸位」、商场边个位嘅景观最好同埋到时会有几多人喺现场。而呢日嘅下昼开始,就不断睇到消息有粉丝赶去现场,务求「搵个靚位睇仔仔」。


小薯仔喺追星路上,去过嘅商场活动不计其数。但呢个记者会,除咗系第一次正式见呢两个组合嘅活动之外,绝对亦系追星史上最早起身同最早出门口嘅活动。去到现场系清晨 6 点左右,但已经数唔清楚有几多人喺里面排紧队,讲紧系咩年龄层同性别都有,嗰阵直头諗唔起对上一次有咁大号召力嘅香港艺人活动系咩。到保安人员开咗锁住唔同位置嘅闸,只系见到「千军万马」一齐「冲锋陷阵」嘅场景,嗰种震撼亦令小薯仔一生难忘!放眼望去,只系见到可以企嘅位,全部都系密麻麻嘅人!

当大家搵到位諗住可以唞下等活动开始,商场方面系冇諗住畀粉丝停落嚟嘅。因为呢个时候开始,就喺大电视轮住播两个组合同成员个人单曲嘅 MV,而粉丝们就好似去咗演唱会咁,睇住个 MV 齐齐大合唱!哗!嗰种声势真系唔讲得笑!个 MV 播几多次,粉丝就唱几多次;见到有记者同工作人员影相就齐齐举高成员嘅应援手牌同灯牌,大嗌成员嘅名。听闻当中有唔少粉丝为咗呢个活动只系休息咗一阵,但系依然有气有力,真系令小薯仔自愧不如。

记者会开始同结束嘅时候,MIRROR 同 ERROR 都系经由距离粉丝群好近嘅扶手电梯上落场地,两次短短嘅路程中都不断同粉丝挥手。当时此起彼落嘅环回立体尖叫声真系有种唔知自己身处何方嘅感觉,比起朝早「千军万马」嘅震撼,简直有过之而无不及!唔止离场同进场,其实成个活动过程都系充满住尖叫声同各个成员嘅名,而家諗返起,个脑都好似有声,真系令人好印象深刻。






而喺活动正式结束后,两个组合都留低接受各个媒体嘅访问,当然粉丝们都系非常热情地继续尖叫。不过呢个时候,MIRROR 嘅队长 Lokman 拎起支咪,话渠哋要做访问,所以想请大家静一静,然后啲尖叫声就真系消失晒。对小薯仔嚟讲,呢个场面应该算系喺商场活动中几罕见嘅,因为印象中比较少活动系现场尖叫声太大而影响到艺人做访问,而渠哋系要讲呢句先可以令粉丝暂时静落嚟,令小薯仔再次感受到,近期嘅人气王真系非渠哋莫属。



其实小薯仔唔算得上系好死忠嘅「镜粉」或者系「404」,同时都觉得 MIRROR 同 ERROR 嘅弹起,有渠哋嘅过人之处同魅力之余,亦有天时地利人和嘅因素存在。不过可以吸引到咁多唔同年龄嘅人疯狂钟意渠哋,又喺活动上全情投入为渠哋尖叫,甚至出心出力做应援,帮渠哋宣传,真心认为渠哋算系好成功—除咗成功收获超高人气,仲成功令个个粉丝都变做青春少艾,每时每刻都「镜不离口」。

由衷希望渠哋可以将自己嘅潜力同可能性不断展示,继续「焫焫焫焫焫焫着」大众,继续「浩浩荡荡迎来另一新世纪」。


撰文:小薯仔
图片来源:ViuTV Facebook、小薯仔现场拍摄