疫情爆发至今都接近两年,即系话大家接近两年冇去过旅行,真系好挂住可以去旅行嘅日子。冇得出国唯有喺香港食好啲,今次就为大家推介5间日式料理餐厅,可以去止吓思乡瘾之余,仲可以打卡,而且食物质素都相当唔错,即刻睇吓有咩好推介啦!



1. 复古和式轻食cafe

相信各位钟意打卡嘅女士,都会留意呢间人气高企嘅和式轻食料理餐厅。餐厅内以怀旧木系设计,每一张台都有干花作为摆设,啱晒钟意影相呃like嘅女仔啊!作为打卡cafe,又点可以只系注重装修呢?餐厅嘅食物质素同样高,色香味俱全,每道料理嘅摆盘都好精致,女仔一个人食啱啱好。而且饭团同埋特饮都整成富士山嘅形状,非常吸睛!食饱之后亦都可以喺店内行吓,店内有婆婆杂货店,售卖各种日式风情精品。出返嚟之后,真系好似去完一转日本,买埋手信先返嚟香港一样。如果想去感受吓日本嘅风情,就记住早啲上网预约啦!


婆婆珈琲屋
地址:尖沙咀弥敦道176号The Nate 一楼全层
时间:上午9:30 ~ 下午6时
电话:9675 1438
https://www.grandmamacafe.com



2. 日式家庭料理

黄埔站开通后,就开咗越嚟越多餐厅,人流都多咗唔少。而今次介绍呢间和式家庭料理餐厅,虽然唔系打卡cafe,但长期都非常多人排队,无半个钟以上都唔会入到去食,小编今次就亲身去试吓系唔系真系咁好食啦!

首先讲吓冷盘先,味道正常,但冇乜特别。「酱油蛋饭」呢个配搭应该唔会太差,但可惜珍珠米饭落得太多水,太过软身,而且蛋味唔够香浓。各款主食嘅味道都唔错,「红酒汁煮牛肋条」焖得软淋入味,「南蛮炸鸡」够脆口,配上特制酱汁,酸酸甜甜颇为开胃。值得一提嘅系,暖配菜「葱烧牛舌」食落好有惊喜。厚薄啱啱好,而且够入味,配上葱烧更加惹味!食完之后,真系会有温暖嘅感觉,而且仲非常之饱,女仔细食嘅话,可以选择同朋友一齐share~


米気
地址:红磡黄埔天地百宝坊(第3期) 地下G32号舖
时间:中午12时 ~ 下午10时
电话:3543 1101



3. 怀旧冰室

呢间位于土瓜湾嘅复古怀旧冰室,入面放满怀旧嘅装饰及摆设,有旧式家庭拨轮电话、大头佛及旧玩具,整体风格而木材为主,而头顶亦有三叶吊扇、怀旧吊灯及单车等。餐厅内360度都系打卡位,预留半日喺入面影相一啲都唔过分!

食物方面系传统日式料理定食,主打日本冲绳县嘅石垣黑毛和牛,入口软嫩,充满牛肉嘅油脂香。定食包含前菜渍物、面豉汤及主食。可以打卡之余,食物嘅CP值都好高,二百蚊都唔使就可以食到日本和牛套餐,非常抵食!


呼吸星球
地址:土瓜湾马头角道91号地舖
时间:上午11时 ~ 下午10时 (周四休息)
电话:2771 7775



4. 环境清幽露天cafe

咖啡店位于「618上海街」,为战前二级历史建筑活化而成。餐厅最大嘅特色系可以选择户外用餐,露天cafe 环境舒适,旁边有唔少植物添加生气。怕热嘅客人可以选择室内用餐,餐厅内嘅墙壁有人手绘画嘅壁画,好有风格!有藤椅座位之余,亦有榻榻米,充满日本风情。

餐厅主打「一汁三菜」及招牌班戟,「一汁」指1份汤品,「三菜」指1道主菜及2道配菜,主食有5款可供选择。而招牌班戟有伯爵茶同桂花两种口味可以拣,伴碟有粟米片及水果,卖相不错。而且入面有烟韧软糯嘅麻糬,配埋奶盖同雪糕,一冻一热好过瘾!



虫二
地址:旺角上海街618号顶楼
时间:上午11时 ~ 下午10时
电话:N/A



5. 健康抵食料理

餐厅内以简约木系为设计,坐得舒适。墙上嘅餐牌用手写风嘅字体印喺木板上,好有日本风情。餐厅每日都有不同嘅精选菜式餐单,最抵食嘅套餐只需要$80,可选三款料理,再配白饭或沙律,跟一杯指定饮品。「明太子玉子烧」卖相吸引,而且份量十足。「茄子豚乐烧」好惹味,酱汁渗入晒茄子入面,味道浓郁。


一木小料理
地址:湾仔厦门街27号地舖
时间:中午12时 ~ 下午10时 (下午3时~6:30 中场休息)
电话:2687 2080

撰文:Athena